“Buxoro” va “Bunyodkor”ning ayrim a'zolari texnik zonaga qo'yilmaydi

Bugun “Buxoro” va “Bunyodkor” jamoalari o'rtasida Coca Cola Superliganing 9-turidan qoldirilgan o'yin bo'lib o'tadi.

Professional futbol mashg'ulotlari hamda musobaqalarini tashkil qilish to'g'risida ishlab chiqilgan vaqtinchalik sanitariya-gigiena qoida va me'yorlarining 4.1 bandiga asosan klublar har bir uchrashuv uchun 35 kishidan ko'p bo'lmagan ishtirok etuvchilar ro'yxatini taqdim etadi. “Buxoro” va “Bunyodkor” ham bugungi bahsda ishtirok etuvchi futbolchi, murabbiy hamda rahbariyatdan iborat personallar ro'yxatini taqdim qildi. O'zPFL Komissiyasi mazkur ro'yxatni o'rganib chiqqach, har ikki klub ro'yxatida reglamentda ko'rsatilganidek zaruriy PZR testini topshirmagan ayrim shaxslar bor ekani ma'lum bo'ldi.

Jumladan, “Buxoro”ning bugungi bahsda ishtirok etuvchilardan iborat ro'yxatiga Alisher Rustamov (bosh direktor), Aleksandr Xomyakov (konsultant murabbiy), Nikolay Minchev (texnik direktor), Hasan Ro'ziev (bosh direktor o'rinbosari sifatida ko'rsatilgan, ammo O'zPFL ro'yxatidan o'tmagan), Avgustin Kiritse (murabbiy), Nodir Jo'raev (murabbiy), Farrux Mirzaahmedov (marketolog), Ilhom Umurov (ma'mur), Oybek Jumanazarov (matbuot kotibi), Rajab Avezov (Haydovchi) hamda Shohjahon Nasimov (futbolchi)lar kiritilgan.

“Bunyodkor”ning xuddi shunday ro'yxatidan esa Marat Miftaxutdinov (katta murabbiy), Rodion Sarichev (massajchi), Botir Parpiev (katta ma'mur), Adham Akbarov (haydovchi) va Asadjon Azimjonov (futbolchi) o'rin olgan.

Reglamentga ko'ra, belgilangan testlarni topshirib, shifokorlardan ijobiy xulosa olmagan har qanday shaxs o'yin vaqtida texnik hududdan o'rin olishi, hatto jamoa avtobusiga qo'yilishi mumkin emas. Shu boisdan yuqorida ism-familiyasi qayd etilganlar bugungi o'yinda texnik zonaga qo'yilmaydi. Ular PZR testi topshirganini tasdiqlab, test javoblarini O'zPFL Komissiyasiga taqdim qilganidan keyingina kelasi uchrashuvlar vaqtida texnik hududga kirishiga ruxsat beriladi.