Davron Fayziev: «Mbappe va Neymar Tuxel uchun ramziy ma'noda qo'ltiq-tayoq vazifasini o'tab berishdi»

"PSJ" birinchi taymni chiroyliroq o'ynab o'tkazdi va yutqazdi. Nega? Chunki chiroyli futbol individual mahoratga ko'proq bog'liq. Natijaga erishish uchun tartib va balans ham kerak. Bu esa murabbiyga bog'liq. Yaqin 45 daqiqa Tuxel faoliyatini belgilab beradi. O'zi oqsoqlansayam jamoasini ravon harakatlantira olishi kerak.

Aslida hammaga tushunarli, "PSJ" "Atalanta"dan moddiy, tarkib, tajriba, daraja jihatdan kuchliroq. Unda nega qiynaldi? Chunki Frantsiyada "PSJ"ning "Atalanta"dek raqiblari yo'q.

Va albatta bugungi o'yindagi intriga mualliflaridan biri Frantsiya sport vaziridir. Chempionatni erta to'xtatib amaliyotni yo'qqa chiqardi.

Mbappe va Neymar Tuxel uchun ramziy ma'noda qo'ltiq-tayoq vazifasini o'tab berishdi. Xulosa chiqarib yarim finalgacha oyog'ini tuzatmasa qiyin bo'ladi. Deylik, "Atletiko"lar ikkinchi oyog'ini ham sindirishi mumkin.

"Atalanta"ga simpatiya paydo bo'lishi tabiiy. Lekin, klub hali Evropada kuchli to'rtlikka tortmaydi. Achchiq haqiqat. Oxirgi daqiqalarda hammasini boy berib tashlash bu faqatgina saviya etishmasligidan.

Davron Fayziev.