Pirloning «Yuve» bosh murabbiyi etib tayinlangani A seriyaga qanday ta'sir ko'rsatadi?
/ Kiritdi: BestMaster Ko'rilgan: 605
Mauritsio Sarrining kutilgan iste'fosidan so'ng Andrea Pirloning kutilmaganda bosh jamoa bosh murabbiyligiga tayinlanishi, nazarimda, bir maromda ketayotgan voqealar rivojini sal buzib qo'ydi.
Birinchidan, Pirloning kelishi "Inter"ga, xususan, shaxsan Kontega bosimni oshishiga sabab bo'lishi mumkin. Bu mavsum marraga "Yuve"dan bir ochko ortda qolib etib kelishi yaxshi natija sifatida qabul qilindi. Keyingi mavsumda esa ikkinchi o'rin "Inter" uchun muvaffaqiyatsizlik sifatida qabul qilinsa, ajab emas. Sarri qolganida, yoki kuchli, tajribali murabbiy kelganida, Konte keyingi mavsumda ham, "Yuve"ning poydevori kuchli ekani, tarkibiga urg'u berib, eski qo'shig'ini davom ettirishi mumkin edi. Endi esa umuman tajribasiz murabbiyga titulni oldirib qo'yishi, birinchi navbatda Kontening o'zi uchun og'riqli bo'lishi katta ehtimol.
Ikkinchidan, Pirloning kelishi "A Seriya"ning musobaqa sifatidagi obro'siga ham salbiy ta'sir qilib qo'yishi mumkin. "Yuventus" 3 yilda 3 boshqa-boshqa murabbiy bilan, boz ustiga, bundan avval hatto yoshlar jamoasiga ham murabbiylik qilib ko'rmagan Pirlo bilan ham Skudettoga ega chiqsa, "A Seriya"da chempionlik uchun raqobat umuman yo'q, demak, intrigasiz musobaqa, degan xulosa chiqarishga asos bo'ladi. Bu o'z navbatida Italiya chempionatiga neytral muxlis e'tiborini jalb qilishni yana ham qiyinlashtiradi.
Uchinchidan, "Roma", "Fiorentina" kabi yangi sohiblari bilan yangi marralarga ko'z tikmoqchi bo'lib turgan klublarga, aksincha, biroz foyda bo'ldi. Endi Maks Allegri yoki Maurisio Pochchetino Turindan qo'ng'iroq qilishlariga umid qilishmaydi va yuqorida aytilgan klublardan biri taklif qilsa, rozi bo'lishi ehtimoli oshdi. Mana bugun "Roma" Pochchetinoga qiziqish bildirayotgani haqida xabarlar paydo bo'la boshladi.
Ko'ramiz. Kelasi mavsum Italiyada ancha qiziq bo'ladiganga o'xshab qoldi.
La Beneamata telegram-kanali.
Bosh sahifaga
243