O'zbekiston U-19 ayollar terma jamoasi Namangandagi mehribonlik uyiga borishdi

O'zbekiston U-19 ayollar terma jamoasi Namanganda o'quv-mashg'ulot yig'ini olib borayotgani haqida avval xabar berib o'tgandik.   Kecha Karima Yo'ldosheva boshchiligidagi terma jamoa futbolchilari Namangandagi 26-sonli Mehribonlik uyiga tashrif buyurishdi.   Mehribonlik uyi tarbiyalanuvchilari futbolchi qizlar bilan o'tkazilgan uchrashuv davomida ularning faoliyati haqida o'zlarini qiziqtirgan savollarga javob olishdi. Shuningdek, uchrashuv davomida Mehribonlik uyi tarbiyalanuvchilariga Namangan viloyati hokimiyati tomonidan taqdim qilingan sovg'alar topshirildi. Bunga javoban Mehribonlik uyidagi bolajonlar ham o'zlari tayyorlagan sovg'alarni futbolchi qizlarga hadya qilishdi va kelgusi musobaqalarda ularga omad tilashdi.    "Bu erga yana kelganimizdan juda xursandmiz. Yozda ham mazkur mehribonlik uyi tarbiyalanuvchilari bilan uchrashgandik. Bu erdagi bolajonlarni mana shunday uchrashuvlar orqali qo'llab-quvvatlashdan mamnunmiz. Uchrashuv davomida ularning ko'zlarida quvonchni ko'rib, o'zimiz ham ularga qo'shilishib quvondik", - deydi Karima Yo'ldosheva.   Eslatib o'tamiz, shu yilning yoz oyida O'zbekiston U-19 ayollar terma jamoasi mazkur mehribonlik uyi tarbiyalanuvchilari bilan uchrashib, ularga mahorat darslari o'tashgan edi.