Dilshod Ashirov: «Terma jamoa manfaati uchun tavakkal qilmadik»

Xabaringiz bor, O'zbekiston milliy terma jamoasiga “Metallurg”ning uch nafar o'yinchisi jalb etilgani, ammo jamoada koronovirus aniqlanganligi bois ular yig'inga chaqirilmaganligi haqida OAVda materiallar chop etilgandi. Biz futbolchilarning bugungi holati haqida muxlislarimizga aniqroq ma'lumot berish maqsadida jamoa shifokori Dilshod Ashirov bilan suhbatlashdik.

— Dilshodjon, pademiya sharoitida klublarda shifokorlarning mas'uliyati, ishi yanada ko'paydi. Qiyin bo'lmayaptimi?
— Albatta, pandemiya turmush tarzimizning barcha jabhalari singari sportchilar hayotiga ham cezilarli o'zgartirishlar kiritdi. Mashg'ulotlar o'tkazish, uchrashuvlarga tayyorgarlik ko'rish jarayonlari avval kuzatilmagan tarzda olib borilayapti. O'ziga yarasha qiyinchiliklar bor. Ammo bunga ko'nikishga majburmiz, ko'nikishimiz shart. O'zbekiston futbol assotsiyaatsiyasi, Professional futbol ligasi rahbariyatiga tashakkur, ular tomonidan ishlab chiqilgan qonun qoidalarga qat'iy amal qilgan holda mashg'ulotlar o'tkazayapmiz, uchrashuvlarga tayyorlanayapmiz. O'z navbatida karantin shartlariga qat'iy rioya etayapmiz.

— Koronavirus pandemiyasi sabab O'zbekiston futbol assotsiatsiyasi Professional futbol ligasi qoshida COVID-19 komissiyasi ish boshladi. Kecha klublar shifokorlari bilan onlayn muloqot o'tkazdi. Dastlabki muloqot nima to'g'risida bo'ldi?
— Ha, kecha PFL rahbariyati, COVID-19 komissiyasi Superliga klublari shifokorlari bilan zoom orqali video konferentsiya o'tkazildi. Juda dolzarb masalalar ko'rib chiqildi. Jumladan, Superliga uchrashuvlariga qanday tayyorgarlik ko'rish, mashg'ulotlarda nimalarga ko'proq e'tibor qaratish, futbolchilardan testni qanday olish, keyingi jarayondagi vazifalar, yashash, mashg'ulot o'tkazish maskanlari, kiyinish, yuvinish xonalarini qanday dezinfektsiya qilish kabi karantin sharoitida taqozo etiluvchi ko'plab masalalar bo'yicha ko'rsatmalar berildi.

— O'zbekiston milliy terma jamoasi avgust oyining dastlabki o'n kunligida o'quv-mashg'ulot yig'inini tashkil etyapti. Yig'inga “Metallurg”dan uch nafar futbolchi jalb qilingandi. Ularning terma jamoaga yuborilmasligi sababi ko'pchilikni qiziqtirmoqda. Aynan jamoada kimlar koronovirusni yuqtirib olishdi?
— Albatta “Metallurg” futbolchilarining O'zbekiston milliy, yoshlar, o'smirlar terma jamoalariga jalb etilayotganligi biz uchun juda yoqimli. Milliy terma jamoamizning bu safargi yig'iniga bir yo'la 3 nafar o'yinchiga chaqiruv kelganligi quvonarli hol. Ammo ularni ayni paytda yig'inga jalb etmay turishlarini o'zimiz iltimos qildik. Boisi “So'g'diyona” bilan o'yindan so'ng ba'zi futbolchilarimizning issig'i chiqdi, kasallik belgilari kuzatildi. Zudlik bilan test topshirdik. Yig'in boshlanishi arafasida test javoblari hali qo'limizga etib kelmaganligi bois terma jamoa shifokoriga bu to'g'rida ma'lumot berdik. Sog'lom futbolchilarga zarar etkazib qo'ymaslik, terma jamoa manfaatlarini ko'zlab, tavakkal qilishni xohlamadik va O'FAga vaziyatni tushuntirib, xat bilan murojaat etdik. Ular so'rovimizni to'g'ri qabul qilishdi. Test natijalarini olganimizda, to'g'ri yo'l tutganligimiz ma'lum bo'ldi. Termaga nomzodlardan Lobanov hamda Ubaydullaevlarda natijalar manfiy, Otaxonovda esa musbat chiqdi.

— Pandemiya sharoitida o'yinchilarni testdan o'tkazib turish juda muhim. “Metallurg” jamoasida o'tgan davr mobaynida bu jarayon necha marta tashkillashtirildi. Hozir klub qarorgohida vaziyat qanday?
— Koronavirus pandemiyasi yurtimizga kirib kelgandan buyon “Metallurg” futbolchilari besh marta test tahlillaridan o'tishdi. Uch marta Toshkentda, ikki marta Bekobodda: sanalari bilan aytishim mumkin: 21-may, 11 iyun, 20 iyul, 27 iyul va 4 avgust. Yakuniy natijalar quyidagicha: ba'zi futbolchilar virusni yuqtirib olishgan, ularning barchasi kasallikni engib, sog'ayib bo'lishgan. Ayni paytda barcha o'yinchilar mashg'ulotlarga yuz foiz tayyor. Shuni ta'kidlash kerak, futbolchilarning immuniteti kuchli. Shu boisdan ham virusni yuqtirib olgan futbolchilarimiz uni boshlaridan engil o'tkazishgan. Oddiy shamollash simptomlaridek. Klub qarorgohida issig'i ko'tarilgan futbolchilarimiz izolyatsiyaga olinib, parvarishlandi. Respublika sog'likni saqlash vazirligi tomonidan tasdiqlab berilgan yo'riqnoma asosida kerakli dori darmonlar qabul qilindi. Ayni paytda xudoga shukur, barcha futbolchilarimiz mashg'ulotlarni boshlab yuborishdi. Xavf ortda qoldi. “Metallurg” muxlislari xavotir olishmasa bo'ladi. Yigitlar avvalgi shiddati, kuch g'ayrati bilan Superliga uchrashuvlarini davom ettirishga tayyor. Shu o'rinda 4 avgust kuni topshirilgan oxirgi test natijalarini kutayapmiz. Qo'limizga tegishi bilan natijalarini O'zPFLga etkazamiz.

— Birinchi davraning so'nggi to'rtta turi markazlashtirilgan holatda – poytaxt va poytaxt viloyati stadionlarida o'tkaziladigan bo'ldi. Bu jamoa shifokorlarining ishini engillashtiradimi yoki...
— Bugungi pandemiya sharoitida chempionat o'yinlarining markazlashtirilgan holatda o'tkazilishi eng to'g'ri yo'l deb hisoblayman. PFL to'g'ri qaror qabul qildi. Jamoalar ichki nazoratdan tashqari yuqori instanktsiyaning jiddiy e'tiborida turadi. Mashg'ulotlar, uchrashuvlar qat'iy tartib, grafik asosida o'tkazadi. Mehmonxonadan to'g'ri stadionga – o'yin yoki mashg'ulotga borib, yana mehmonxonaga qaytiladi. Bu esa kasallik yuqtirish riskini keskin kamaytiradi.

"Metallurg" matbuot xizmati.

Manba: metallurg-pfc.uz