Abdulla Tangriev MMA’ga o'tishi va taklif bo'lsa istalgan sportchi bilan jang qilishga tayyorligini ma'lum qildi (video)

Dzyudo bo'yicha Osiyo va Jahon chempioni, Olimpiada sovrindori Abdullo Tangriev «Daryo» internet-nashriga eksklyuziv intervyu berdi. Intervyuni «Daryo» muxbiri Feruz Muhammad tashkillashtirdi.

Suhbat davomida Abdulla Tangriev agar taklif bo'lsa, MMA’ga o'tishi va istalgan MMA jangchisi bilan jangga chiqishini ma'lum qildi.

"MMA sportiga bundan ancha oldin, ya'ni 2012 yil o'tmoqchi bo'lganman. Bu sport turi ham tashqaridan oson ko'ringani bilan eng og'ir sport turlaridan biri hisoblanadi. Chunki bu sport turi aralash sportlar ya'ni ham boks, ham kurash, kikboksing, xullas, hamma sportlarning jamlanmasi hisoblangan sport turi sanaladi. MMA sport turida nom qozonish uchun jiddiy tayyorgarlik ko'rish kerak. Sizning kuchli promouteringiz bo'lishi kerak. Katta shouga tayyor bo'lishingiz kerak. Hozirgi kunda ham qaysi MMA sportchisi jangga taklif qilsa, hech qaysisiga rad javobini bermasdan jang qilishga hamisha tayyorman.

Bizda MMA sportiga yaqin kunlargacha e'tibor bo'lmagan. Bizning MMA sportchilarimiz ham asosan boshqa davlatlarning klublarida kurashib, o'sha erlarda ringga chiqib, sakkiz burchakda jang qilib kelishgan. Menga Moskvada yurgan vaqtimda o'rtoqlarim MMA’ga o'tmaysanmi deb taklif qilishgan edi. O'shanda rad qilganman, agar o'tganimda balki dzyudo chempioni emas, MMA chempioni bo'lib ketarmidim.

Allohga shukr, dzyudoda ham, milliy kurashda ham bir sportchi niyat qilib, maqsad qilgan natijalarining barchasiga erishganman. Bu uchun Allohga behisob shukrlar, hamd-u sanolar bo'lsin", — dedi Abdulla Tangriev.

Ma'lumot uchun, Abdullo Tangriev 1981 yil 28 martda Surxondaryo viloyatida tug'ilgan. U 19 yoshida O'zbekiston terma jamoasiga chaqirilgan. Sidney—2000 yozgi Olimpiada o'yinlarida qatnashgan. Abdulla Tangriev dzyudo bo'yicha Osiyo va Jahon chempioni, 2008 yil Pekinda o'tkazilgan Olimpiada o'yinlarida kumush medaliga ega chiqqan.