Ibrahimovich A seriyaning bir mavsumida 10ta gol urgan eng qari futbolchiga aylandi

Italiya chempionatining 38-turi doirasida «Milan» o'z uyida «Kalyari»ni qabul qilib, yirik hisobda g'alaba qozondi.

"Rossoneri"ning gollaridan biriga Zlatan Ibrahimovich mualliflik qildi. Shvetsiyalik futbolchi uchun bu gol A seriyaning joriy mavsumidagi o'ninchi gol bo'ldi.

Shu tariqa, Ibrahimovich 38 yoshu 302 kunlik paytida Italiya chempionatining bir mavsumida 10ta gol urgan eng yoshi katta futbolchiga aylandi.

Shu paytgacha ushbu rekord Italiya chempionatlari tarixidagi eng yaxshi to'purar Silvio Piolega tegishli edi — 38 yoshu 127 kun.