Jaloliddinov: "Tanqid qilganlarga o'z o'yinim bilan javob qaytaraman"

Xabaringiz bor, Moskvaning "Lokomotiv" klubi o'zbekistonlik yarim himoyachi Jasur Jaloliddinov bilan shartnoma imzoladi. Saytimiz muxbiri Jasur bilan bog'landi va uning "temiryo'lchilar" safidagi ilk taassurotlari bilan qiziqdi.

– Jasur yangi jamoaga o'tganingiz bilan tabriklayman. Ilk taassurotlar qanday?

– Rahmat. Taassurotlar ajoyib. Bunday buyuk jamoaga kelib qo'shilish ancha yoqimli. Klubning imkoniyatlari, bu erda yaratilgan shart-sharoitlar va yana ko'plab jihatlari ancha yaxshi.

– Sizni yangi jamoada qanday kutib olishdi?

– Kutganimdan ko'ra ancha yaxshi kutib olishdi. Bu erda bunday narsalarga ancha boshqacha yondashishar ekan.

– Jamoa bosh murabbiyi bilan ko'rishib, gaplashib oldingizmi?

– Ha, kelgan kunim Marko Nikolich bilan gaplashib oldik.

– Rossiya chempionatida o'ynashingizni bilib, ertaroq rus tilini o'rganishni boshlaganmidimiz?‌‌

– Men uzi rus tilini avvaldan yaxshi bilardim. Yoshligimdan murabbiylarim rus bo'lgan ular bilan ruscha gaplashardik. Qolaversa, rus maktabda o'qiganman. Til bilan muammo yo'q.

– "Bunyodkor"dan tashqari Evropaning birorta ikkinchi ligasiga ijaraga berishi haqida gap bor. Qaysi birini tanlar edingiz? "Bunyodkor" yoki ikkinchi liga?

– Bilmadim. Bu haqda meni xabarim yo'q. Hech kim meni bu to'g'risida ogohlantirmadi. Men faqat "Lokomotiv"da qolish haqida o'ylayapman.

– Rus matbuotida bazi jurnalistlar sizning "Loko"ga transferingizni qoraladi. Bu sizga qanday ta'sir qiladi?

– To'g'risini aytsam, bunday narsalarga e'tibor ham bermayman. Hammasiga o'z o'yinim bilan javob qaytaraman.

– Sizga "Lokomotiv"dan tashqari boshqa klublardan ham takliflar bormidi?

– Ko'plab jamoalardan taklfilar bor edi. Lekin aniq taklif "Loko"dan tashqari "Beshiktosh"dan bo'ldi. Men "Lokomotiv"ni tanladim. "Temiryo'lchilar"ning takliflari qiziq tuyuldi.

– Sizni shu darajaga chiqishingizga sababchi bo'lgan "Bunyodkor" rahbariyati va muxlislariga tilaklaringiz.

– "Bunyodkor"ga omad tilayman. Agar bu jamoa bo'lmaganida men bu darajaga chiqolmagan bo'lardim. Doim bizni qo'llab-quvvatlab turgan muxlislarga rahmat, sizlar eng zo'risizlar. "Bunyodkor" doim yuragimda qoladi.