«Yuventus» — ketma-ket 9-marta Italiya chempioni!

Italiya chempionatining 36-turi doirasida «Yuventus» o'z maydonida «Sampdoriya»ni qabul qilib, qiyin g'alabani qo'lga kiritdi.

Birinchi bo'limga qo'shib berilgan 7-daqiqa o'tib borayotganida "Yuventus" jarima zarbasini tepish huquqini qo'lga kiritdi. Pyanich himoyachilarni chalg'itib, jarima maydoni ichidagi Ronalduga pas berdi. Krishtianu 12 metrlardan darvoza tomon aniq zarba berdi va hisobni ochdi.

Ikkinchi bo'lim o'rtalarida mezbonlar tezkor qarshi hujum tashkil qilishdi. Ronalduning zarbasidan keyin darvozabon to'pni qaytardi. To'pga birinchi bo'lib etib kelgan Bernardeski hisobdagi farqni oshirdi.

Oradan 10 daqiqa o'tib mehmonlar yarim himoyachisi Torsbi ikkinchi sariq kartochkani olib, maydonni tark etdi.

O'yin so'ngida Ronaldu uchun yaxshi imkoniyat yuzaga keldi — "Sampdoriya" darvozasi tomon penalti belgilandi. Krishtianuning kuchli zarbasidan keyin to'p to'singa tegib, maydonni tark etdi.

Shunga qaramay, "Yuventus" g'alaba qozondi hamda mavsum tugashiga 2 tur qolganida Skudettoni qo'lga kiritdi.

Italiya A seriyasi, 36-tur
Yuventus – Sampdoriya 2:0 (1:0, 1:0)
Gollar: 1:0 – 45 Ronaldu, 2:0 – 67 Bernardeski.
Noaniq penalti: Ronaldu (89, to'sin)
Yuventus – Shchensni, Aleks Sandro, de Ligt (Rugani, 78), Bonuchchi, Danilo (Bernardeski, 29), Rabo, Matyuidi, Pyanich (Bentankur, 78), Kuadrado, Dibala (Iguain, 40), Ronaldu.
Sampdoriya – Audero, Tonelli, Shabo (Leris, 22), Audjello, Depaoli, Yankto (Gabbyadini, 73), Torsbyu, Ramires (Maroni, 90), Linetti, Yosida, Kualyarella.
Ogohlantirishlar: Pyanich (45), Torsbyu (45), Tonelli (45), Yankto (65), Bernardeski (69), Kuadrado (80), Rabo (86), Depaoli (88).
Chetlatish: Torsbyu (77).