Belarus chempionati. Yaxshiboev «dubl» qayd etgan o'yinda «Shaxtyor» yirik hisobda g'alaba qozondi (video)

Belarus chempionatining 19-turi doirasida "Shaxtyor" o'z uyida "Smolevichi" klubini qabul qilib, yirik hisobda g'alaba qozondi. O'zbekistonlik hujumchi Jasur Yaxshiboev yangi jamoasi safida uchrashuvni ilk marta asosiy tarkibda boshladi.

Bahsning 9-daqiqasida Yaxshiboev 15 metrlardan yo'llagan zarba natijasida to'p himoyachiga tegib qaytdi. To'pni egallagan Antich o'tkir burchak ostida bo'lishiga qaramay, kuchli zarba bilan hisobni ochdi.

Ikkinchi bo'limda esa "konchilar" raqibni butunlay tor-mor keltirishdi. Bunda esa Jasurning hissasi katta bo'ldi. Uchrashuvning 62-daqiqasida hamyurtimiz maydon markazida to'pni egallab, ikki himoyachiga qarshi chiqib bordi va ulardan birini aldab o'tib, darvozabon bilan yakkama-yakka vaziyatda o'ng oyoq bilan darvozani ishg'ol qildi.

Oradan 8 daqiqa o'tib, Yaxshiboev yana bitta gol muallifiga aylandi. Bu safar u chap qanotdan jarima maydoniga kirdi, ikki himoyachini osonlik bilan aldadi va darvozabonni dog'da qoldi.

Hamyurtimizning gollari orasida Szoke "Shaxtyor"ning uchinchi golini raqib darvozasiga joylagan edi.

Ushbu g'alabadan keyin "Shaxtyor" o'z ochkolarini 37taga etkazib, BATE bilan birga peshqadamga aylandi. Yaxshiboev esa 12ta gol bilan to'purarlar poygasida yaqqol peshqadam bo'lib oldi.

Belarus chempionati, 19-tur
ShAXTYoR — SMOLEVIChI — 4:0
GOLLAR: 1:0 — Antich (9). 2:0 — Yaxshiboev (61). 3:0 — Szoke (69). 4:0 — Yaxshiboev (70).
ShAXTYoR: Gutor (k) — Vukmanich (Burko, 75), Xadarkevich, Sachivko, Antich — Szoke, Selyava — Ivanovich (Balanovich, 46), A.Arxipov (Bodul, 46), Podstrelov — Yaxshiboev.
SMOLEVIChI: Gomelko — Alibekov, Rodionov, Jevnerov (k), Xalimonchik — Shegrikovich (Xankevich, 77) — Gurban (Makushinskiy, 67), Makarov, Djigero, Lojkin (Aleksandrovich, 82) — Demchenko.
SOLIGORSK. 26 iyulya. Stadion "Stroitel".

Jasur Yaxshiboevning birinchi goli:

Jasur Yaxshiboevning ikkinchi goli: