A seriya. Chempionlikni nishonlamoqchi bo'lgan «Yuventus», «Udineze»ga mag'lub bo'ldi

«Yuventus» Italiya chempionati tugashiga 3 tur qolganida chempionlikni rasmiylashtirishi mumkin edi, agar turinliklar bugun «Udineze»ni mag'lub eta olishganida.

Udeneliklar esa "3 daqiqasi kam" chempion bilan o'yinda nafaqat mag'lubiyatdan qutulib qolishdi, balki so'nggi daqiqalarda g'alabani ham ilib ketishdi.

Birinchi bo'lim tugashiga 3 daqiqa qolganida Matteys de Ligt hujumga qo'shildi va kutilmaganda 22 metrlardan zarba berdi. To'p esa darvozaga burchagiga kirib ketdi.

Ikkinchi bo'lim boshida mezbonlar futbolchisi Nestorovski "Yuve" himoyachisi Ruganining xatosidan foydalanib, hisobni tenglashtirdi.

Sarri shogirdlari ikkinchi taym davomida "Udineze" mudofaasini yorib o'tishga urindi, ammo jamoaga ijodkorlik va tezlik etishmadi. Aksincha, bo'limga qo'shib berilgan daqiqalarda mezbonlar qarshi hujum tashkil etishdi. Fofana maydon markazida to'pni egalladi, yo'l-yo'lakay Rugani va de Ligtni aldab o'tib, darvozabonni ham dog'da qoldirdi.

Shu tariqa, "Yuventus" chempionlikni tantana qilish kutilgan o'yinda, aksincha, safardan mag'lubiyat bilan qaytadigan bo'ldi. Boz ustiga, "Oltin butsa" uchun kurashayotgan Ronaldu ham maydonni golsiz tark etdi.

Italiya A seriyasi, 35-tur
Udineze – Yuventus 2:1 (0:1, 2:0)
Gollar: 0:1 – 42 de Ligt, 1:1 – 52 Nestorovski, 2:1 – 90 Fofana.
Udineze – Musso, Zegelar (Larsen, 69), Rodrigo Bekao (De Mayo, 90), Nyuytink, ter Avest (Samir, 78), Fofana, Sema, de Paul, Trost-Ekong, Nestorovski, Okaka Chuka.
Yuventus – Shchensnii, de Ligt, Danilo (Kuadrado, 75), Rugani, Aleks Sandro, Bentankur, Rabo, Remzi (Matyuidi, 60), Bernardeski (Duglas Kosta, 60), Dibala, Ronaldu.
Ogohlantirishlar: Remzi (1), Trost-Ekong (20), Zegelar (68), Kuadrado (83).