Lempard «Liverpul» - «Chelsi» o'yini paytida Kloppni so'kdi

Internetda «Chelsi» bosh murabbiyi Frenk Lempard va «Liverpul» ustozi Yurgen Klopp o'rtasida yuz bergan mojaro videosi paydo bo'ldi.

APLning 37-turi doirasida bo'lib o'tgan uchrashuv paytida Lempard mersisaydliklar zaxira o'rindig'idagilarning qoidabuzarlik yuz bergani haqidagi fikrni eshitib, ularga yuzlandi va: «Qanaqasiga fol? U erda fol yo'q!» — deya baqirdi.

Ushbu vaziyatga Yurgen Kloppning yordamchisi Pep Linders aralashdi, ammo «Chelsi» ustozi uni so'kdi. Oraga Klopp qo'shildi va o'z yordamchisidan joyiga o'tirishni so'radi hamda Lempard: «Tinchlan», dedi. Shuningdek, Yurgen «Chelsi» murabbiyidan o'zining yordamchisi bilan gaplashmaslikni so'radi.

Shundan so'ng «Liverpul» xodimlaridan bir yana "axir bu fol", dedi. Lempard esa unga javoban: «Men sendan so'ramadim, o'zingni bos!», deya baqirdi. Bundan jahli chiqqan Klopp Frenkka baqirib berdi. Lempard beadab so'zlari bilan Yurgenga javob qaytardi: «Sen ham bor yo'qol! Sen faqat bitta sovrinni yutgansan. Daf bo'l!»

Eslatib o'tamiz, «Liverpul» kecha «Chelsi» ustidan 5:3 hisobida g'alaba qozondi.