«Yuventus» Buffonning rekordi sharafiga maxsus futbolkada o'ynadi (foto)

«Yuventus» darvozaboni Janluiji Buffon Italiya chempionatining 30-turidan o'rin olgan «Torino»ga qarshi bahsda (4:1) boshlang'ich tarkibdan joy oldi va maydonda to'liq 90 daqiqa harakat qildi.

42 yoshli italiyalik posbon uchun mazkur bellashuv Italiya chempionatidagi 648-uchrashuv bo'ldi. Buffon shu tariqa ushbu ko'rsatkich bo'yicha «Milan» sobiq himoyachisi Paolo Maldinining rekordini yangiladi. Buffondan keyingi o'rinda quyidagi futbolchilar joylashgan:

2. Paolo Maldini (647)
3. Franchesko Totti (619)
4. Xaver Zanetti (615)
5. Janluka Palyuka (592)

Ma'lumot uchun, Buffon 2001 yildan beri «Yuventus» (orada bir mavsum PSJ safida ham harakat qildi) sharafini himoya qilib keladi. Ushbu mavsumda u A Seriyada 8 ta o'yin o'tkazdi.

Avvalroq Buffon «Yuventus» bilan shartnomasini uzaytirgani haqida xabar berilgandi.

"Yuventus" futbolchilari Buffonning rekordi sharafiga kecha maxsus tayyorlangan futbolkada o'ynadi.