«Brayton» yarim himoyachisi Jeyms Milner Ginnesning rekordlar kitobi rekordlarini zabt etganidan so'ng uchta alohida mukofotga loyiq ko'rildi.

21 fevral kuni 40 yoshli angliyalik futbolchi APLning 27-turi doirasida «Brentford»ga qarshi o'yinda «Brayton»ning asosiy tarkibida maydonga tushdi. Bu uning chempionatdagi faoliyati davomidagi 654-uchrashuvi bo'ldi. Shu tariqa, Milner Angliya terma jamoasi sobiq yarim himoyachisi Garet Berriga tegishli bo'lgan Premer-ligadagi o'yinlar soni bo'yicha rekordni yangiladi.

Shuningdek, Jeyms APLdagi birinchi va oxirgi gollari orasidagi eng uzoq vaqt (22 yil va 248 kun) hamda chempionatda ketma-ket o'tkazilgan mavsumlar soni (24 ta) bo'yicha ham rekordlarga ega.

«Yoshligimda har yili Rojdestvo bayramiga Ginnesning rekordlar kitobini sovg'a sifatida olardim. Endi esa u erdan joy olish hayratlanarli», — dedi Milner.

Angliya terma jamoasining sobiq a'zosi APLdagi debyutini 2002/03 yilgi mavsumda o'tkazgan — u «Lids» safida «Vest Xem»ga qarshi o'yinda (4:3) zaxiradan maydonga tushgan edi.