Italiya kubogi. «Yuventus» safardagi gol tufayli finalga chiqdi

Italiya kubogining dastlabki finalchisi aniq bo'ldi. Bu — "Yuventus".

"Milan" yarim final bosqichi doirasidagi dastlabki o'yinning eng so'nggi daqiqasida VAR belgilangan penalti tufayli g'alabani qo'ldan chiqadi.

Videoyordamchi hakam bu safar ham "rossoneri"ning zarariga qaror chiqardi. Bahsning 16-daqiqasida belgilangan penaltini Krishtianu Ronaldu aniq amalga oshira olmadi. Uning zarbasidan so'ng to'p ustunga tegib qaytdi.

Ushbu lahzaning o'zida hujumga o'tayotgan milanliklar yana bir omadsizlikka duch kelishdi. Jamoa hujumchisi Ante Rebich oyog'ini baland ko'tarib, raqib yuziga tepib yubordi. Referi uni darhol maydondan chetlatdi. Darvoqe, birinchi uchrashuvda "Milan" futbolchisi Teo Ernandes qizil kartochka olgan edi.

Safardagi gol qoidasiga ko'ra, "Yuventus" oldinda bo'lgani uchun qolgan daqiqalarda "Milan"ga vaziyatni o'nglash oson bo'lmadi. Turinliklar to'p bilan ko'proq muomalada bo'lishdi. "Rossoneri" esa imkon bo'ldi deguncha qarshi hujumdan foydalanishga urindi. Ammo bugun jamoalarga darvozani ishg'ol qilish nasib etmadi.

"San-Siro"dagi gol esa "Yuventus"ni Italiya kubogi finaliga olib chiqdi.

Italiya kubogi, yarim final, javob o'yini
Yuventus – Milan 0:0
Yuventus – Buffon, Danilo (Kuadrado, 86), de Ligt, Aleks Sandro, Bonuchchi, Matyuidi (Rabo, 62), Pyanich (Xedira, 62), Bentankur, Duglas Kosta (Bernardeski, 63), Ronaldu, Dibala.
Milan – Donnarumma, Konti (Salemakers, 88), Kalabriya (Laksalt, 88), Romanoli, Ker, Bennaser, Chalxanoglu, Lukas Paketa (Kolombo, 82), Bonaventura (Rafael Leau, 52), Kessie (Krunich, 82), Rebich.
Ogohlantirishlar: Konti (19), Pyanich (43), Xedira (74).
Chetlatish: Rebich (16).