Muxlislarsiz futbol «Barselona»ga foyda keltiradimi yoki zarar?

Muxlislarsiz o'tadigan futbolda ba'zi jurnalistlar "Barselona" imkoniyatlarini tushib ketishini taxmin qilishmoqda. Bunga sabab esa, bu mavsumda kataloniyaliklar "Kamp Nou"da 95 foiz ochko olgan bo'lishsa, safarda bu juda yomon - 40 foiz. Bu esa, "Barselona"ni "uy jamoasi" deyishga sabab bo'lgan.

Menimcha esa, bir jamoaning uy va safar uchrashuvlari o'rtasida bu qadar katta farqning bo'lishi faqat o'z muxlislarining yordami tufayli emas. Ya'ni "Barselona" o'z uyida muxlislar yordami bilan foizni 95 ga ko'tarmagan, aksincha, safarda, raqib jamoa muxlislarining faolliklari oqibatida safar o'yinlari ko'rsatkichi 40 foizga tushib ketgan.

Ikkinchi variantga ishonish oson, chunki odatda, kuchsizroq klublar kuchli raqibiga etarli qarshilik qila olishda muxlislar yordami qo'l keladi. O'yinning emotsional sharoitga o'tishi ko'proq kuchsizroq jamoaning imkoniyatini oshiradi. Buni biz masalan, "Barselona"ning so'nggi yillardagi eng alamli mag'lubiyatlari - Rim va Liverpuldagi o'yinlarda ham ko'rishimiz mumkin.

Ya'ni, tribunada muxlislarning yo'q bo'lishi, aksincha, "Barselona"ga yordam beradi va safar o'yinlaridagi 40 foizni oshiradi, menimcha. O'z maydonida esa, kuchli jamoa shundoq ham raqibini engishi mumkin.

Qahramon Aslanov