O'zbek sporti jurnalistikasi otaxoni Axbor Imomxo'jaevga Akademik ilmiy unvoni topshirildi

O'zbekistonda xizmat ko'rsatgan yoshlar murabbiysi, umrining 60 yilini futbol rivoji, targ'iboti va jurnalistikaga bag'ishlagan Axbor Imomxo'jaev Akademik unvoni bilan taqdirlandi.

Ularning 12 yil davomida to'plangan ma'lumotlar asosida bitilgan “Asr futbolidagi asr qadrdonlarim” kitoblari ziyolilar va arboblar tomonidan e'tirof etildi. Shu yilning fevral oyida, 84 yoshlari arafasida O'zbekiston davlat jismoniy tarbiya va sport universiteti Kengashi qarori bilan Axbor Rustamovichga universitetning Faxriy professori unvoni berilgan edi.

Kuni kecha esa ular O'rta Osiyo xalqlari tarixi instituti Turon fanlar akademiyasi Prezidiumining qarori bilan akademiyaning haqiqiy a'zosi deb qabul qilindilar va «Akademik» ilmiy unvoni bilan taqdirlandilar. Unvonni Turon fanlar akademiyasi prezidenti Haydarbek Bobobekov topshirdi.

O'zbek futbol sharhlovchiligi maktabining asoschisi Axbor Imomxo'jaevga uzoq umr, sihat-salomatlik tilab qolamiz!