Kutimagan burilish: Edegor "A" Seriyaga yo'l olishi mumkin

Madridning "Real" klubi yarim himoyachisi Martin Edegor yozda jamoasini o'zgartirishi mumkin. Futbolchi joriy mavsumni "Real Sosedad" safida ijarada o'tkazmoqda.

SportMediaset nashrining xabariga ko'ra, 21 yoshli futbolchi xizmatiga "Milan" klubi qiziqish bildirmoqda. Edegorning transfer narxi 40 million evro atrofida, shu sababli "rossonerilar" uni sotib olish huquqi bilan ijaraga olishga harakat qilib ko'radi. 

Eslatib o'tamiz, avvalroq madridliklar bosh murabbiyi Zinedin Zidan Edegorni o'z rejalariga kiritayotgani va uni yozda ijaradan qaytarishi haqida xabarlar tarqalgandi. Bu mavsum havbek La Ligada 23ta o'yinda maydonga tushib, 4ta gol urgan hamda 6ta golga assistentlik qilgan.