La liganing yangi mavsumida tomoshabinlar stadionga kiritiladi

Ispaniya oliy sport kengashi prezidenti (CSD) Iren Losano bayonot berishicha, La liganing 2020/21 yilgi mavsumidan boshlab tomoshabinlar stadionga kiritilishi mumkin. Ammo bunda muxlislar o'rtasidagi ijtimoiy masofa saqlanishi talab etiladi. Shu bois, stadionga kiradigan ishqibozlar soni cheklanadi.

«Buni istisno qilmaymiz. Vaziyat qanday rivojlanishidan kelib chiqib kelgusi mavsumda biz ma'lum sondagi muxlislarning stadionga kirishiga ruxsat berishimiz mumkin.

Hozir asosiy maqsadimiz — ushbu mavsumni yakunlash va tabiiyki, ayni paytda eng yaxshi variant — uchrashuvlarni tomoshabinlarsiz o'tkazish. Lekin biz yangi normalarga qaytganimizda xavsizlik choralariga amal qilgan holda muxlislarning stadionga qaytishiga erishishimiz mumkin», — dedi Losano "Cadena Cope".

Ispaniyaning ushbu mavsumi 11 iyun kuni qayta boshlanishi kutilmoqda. Klublar hozirda jamoaviy mashg'ulotlarda ishtirok etishmoqda.