Buxorolik bokschi qiz xalqaro turnirda oltin medalni qo'lga kiritdi

14-21 yanvar kunlari Serbiyaning Sobmor shahrida o'smir qizlar va ayollar o'rtasida boks bo'yicha sakkizinchi “Millatlar kubogi-2019” xalqaro turniri o'tkazilmoqda. Musobaqada Xitoy, Xorvatiya, Chexiya, Frantsiya, Germaniya, Gretsiya, Vengriya, Qozog'iston, Litva, Latviya, Norvegiya, Polsha, Ruminiya, Sloveniya kabi 21 ta davlatdan 200 nafarga yaqin sportchi qizlar ishtirok etishmoqda.

Ushbu nufuzli musobaqa ilk marotaba yurtimiz vakili ham ishtirok etdi. Yurtimiz sharafini murabbiy Ulug'bek Baratov murabbiyligi ostida 2003 yilda tug'ilgan bokschi qizimiz Sabina Boboqulova (-48 kg) himoya qildi.

Dastlabki janglarida Qozog'iston va Germaniya vakillarini mag'lubiyatga uchrata olgan bokschimiz, finaldagi raqibi rossiyalik Anastasiya Kirienkodan 5:0 hisobida ustun keldi va oltin medalni qo'lga kiritdi.

Eslatib o'tamiz, S.Boboqulova 2018 yilning 3-10 dekabr kunlari Qozog'istonning Almata shahrida o'tkazilgan xalqaro turnirda ham oltin medalni qo'lga kiritgan edi.