Angliya terma jamoasi a'zosi Kiran Tripper totalizatorga oid qoidalarni buzganlikda ayblanmoqda

Angliya futbol assotsiatsiyasi (FA) «Atletiko» himoyachisi Kiran Tripperni totalizator bilan bog'liq qoidalari buzganlikda ayblamoqda.

Sky Sports xabariga ko'ra, ayblov futbolchining 2019 yil yozida «Tottenhem»dan 21,7 million funt evaziga «Atletiko»ga yo'l olishi bilan bog'liq. Angliya terma jamoasi a'zosi transferning amalga oshishiga pul tikkan bo'lishi mumkin.

Agar FA angliyalik futbolchini aybdor deb topsa, Tripperni katta miqdordagi jarima va uzoq muddatli diskvalifikatsiya kutmoqda. Kiran 2020 yilning 18 mayiga qadar tashkilot aybloviga javob berishi kerak.

29 yoshli himoyachining o'zi futbolga oid hech qanday garovga aralashmaganligi va boshqa futbolchilarning pul tikishidan moliyaviy foyda olmaganini ta'kidlagan.

Eslatib o'tamiz, mart oyida angliyalik hujumchi Deniel Starrij shunga o'xshash holatda totalizatorga oid qoidalarni buzganlikda aybdor deb topilib, 2020 yilning 17 iyuniga qadar futbolga oid faoliyatdan chetlatilgandi.