Bu qiziq! Roy Kin Xendersonga g'alati maslahat bergan

Angliyaning «Liverpul» klubi sardori bir yil avval Kataloniyaning "Barselona" sardori Leo Messi bilan nima uchun futbolka almashtirmaganini so'zlab berdi.

Xendersonning aytishiga qaraganda, "Manchester Yunayted" klubi sobiq sardori Roy Kinning bergan maslahati uning yodiga tushib qolgan.

«Lionel Messiga qarshi dastlabki uchrashuvim o'tgan yili «Kamp Nou»da bo'lib o'tgandi. Oldin men u bilan to'qnash kelmaganman. Maydonga unga qarshi harakat qilish – o'yinni televizor orqali tomosha qilishdan keskin farq qiladi. U ajoyib tezlikka ega. Messining jarimadan kiritgan goliga hozirgacha ishona olmayman. Ammo, o'yindan keyin u bilan futbolka almashtiraman deb o'ylamagandim, chunki, hech qachon bunday qilmaganman.

Bir marta menga Roy Kin raqib futbolchisi bilan futbolka almashtirishni so'rash – o'zingning ojizligingni namoyish etish bilan teng, degandi. Shu sababli, men doim uning so'zlariga amal qilardim», — dedi Jordan Xenderson.