Bilasizmi? Muhiddin Abduvaliev "Qo'qon-1912" to'purari hisoblanadi
/ Kiritdi: BestMaster Ko'rilgan: 224
Avval xabar berganimizdek "Qo'qon-1912" jamoasi bu yil kuchlilar safida 15-mavsumni o'tkazmoqda. Qo'qonliklar O'zbekiston chempionatlari tarixida 431 ta o'yinda maydonga tushishgan va jami 573 ta gol kiritishgan. Ana shu 573 ta gol 78 nafar futbolchi tomonidan kiritilgan.
Qo'qonliklar tarkibida eng ko'p gol urgan futbolchi Muhiddin Abduvaliev hisoblanadi. Ayni kunlarda jamoamiz murabbiylar shtabida faoliyat olib borayotgan Abduvaliev, "Qo'qon-1912" tarkibidagi faoliyati davomida raqib darvozabonlarini 40 marta ranjitgan.
"Qo'qon-1912" tarixidagi to'purarlar bilan tanishing.
Eng ko'p gol Muhiddin Abduvalievga tegishli – 40 ta. Keyingi o'rinda Soli Qurbonov — 34 ta, Rustam Abdullaev — 32 ta, Oydinbek Aliev — 30 ta, Zohid Nurmatov — 29 ta. Gollardan naqd 44 tasi penaltidan raqib darvozasiga kiritilgan.
Muhiddin Abduvaliev "Qo'qon-1912" jamoasining O'zbekiston chempionatlari tarixidagi ilk goli hamda yubiley, 300 - golining ham muallifi hisoblanadi. 1992 yildagi chempionatning ikkinchi turida Qo'qonliklar o'z maydonlarida Toshkentning "Traktor" jamoasini qabul qilishgan hamda o'sha o'yinda Muhiddin Abduvaliev jamoaning dastlabki golini Toshkentliklar darvozasiga kiritgan.
2000 yilgi O'zbekiston chempionatining 23-turida “Kimyogar” darvozasiga 300-gol kiritilgan. Mazkur bahsda 4:2 hisobida Qo'qon jamoasi g'olib chiqqan. Uchrashuvning 27-daqiqasida Muhiddin Abduvaliev o'yindagi ikkinchi va jamoa tarixidagi 300-golga mualliflik qilgan edi.