Klass Shormann: “Olimpiada mash'alasi bizni kutib turibdi”

Zamonaviy beshkurash xalqaro ittifoqi (UIPM) prezidenti Klass Shormann tashkilot yangi musobaqalar taqvimini tuzish ustida ish olib borayotganligi haqida bayonot berdi va milliy federatsiyalarga bu haqida ma'lum qildi.

Sportning boshqa turlari kabi zamonaviy beshkurash ham koronavirus pandemiyasidan zarar ko'rdi. Yuqumli kasallik tarqalishi munosababti bilan chegaralash choralari ko'rilgani uchun UIPMning Jahon kubogi va Jahon birinchiligi belgilangan muddatlarda o'tkazilmadi.

– Biz zamonaviy beshkurash xalqaro ittifoqi (UIPM) Ijroiya qo'mitasi doirasida 2020 yilning keyingi oylari va 2021 yilda o'tkaziladigan musobaqlar muddatlariga aniqlik kiritmoqdamiz, – dedi Klaus Shorman. – Tokio Olimpiadasi tsikli to'rt yildan besh yilga uzaytirilganligi sizni qiyin ahvolga solib qo'yganligini bilaman. Endi “Tokio-2020” Olimpiadasi 2021 yilning 23 iyulidan 8 avgustigacha o'tkaziladigan bo'ldi. Ammo butun sport olami huddi shunday vaziyatga tushganligini yoddan chiqarmang.

– Bu sizlar uchun Olimpiya o'yinlariga tayyorgarlik ko'rish yana 12 oyga cho'zilganligini anglatadi, – deya alohida ta'kidladi Klaus Shormann. – Ushbu holat hozirgi kunda sizning zamonaviy beshkurash bilan zarur darajada shug'ullana olmasligingizni ham anglatadi. Ammo hozirgi qora tuynuk oxirida nur ko'rinmoqda. Olimpiada mash'alasi hali ham Tokioda porlab turibdi va bizni kutmoqda.