Ueyn Runi: «Tan olish og'ir, ammo «Liverpul» eng kuchli hujum chizig'iga ega»

«Derbi Kaunti» hujumchisi Ueyn Runi «Liverpul» hujum chizig'ini jahondagi eng kuchlisi deb hisoblashini aytib o'tdi.

«Gollar o'yinchilarning o'zaro bir-birini yaxshi tushunishiga bog'liq. «Liverpul»ning hujum uchligi — ideal ko'rinishda. Muhammad Saloh va Sadio Mane hujumning keskinligini ta'minlaydi. Natijada raqib himoyachilari o'z darvozalari tomon surilishga majbur bo'lishadi. Bu esa Roberto Firminoga to'pni qabul qilish uchun ochiq hududga ochilishga imkon beradi. Markaziy himoyachilar bo'shashishsa, Saloh va Mane katta tezlikda oldinga o'tib, bo'sh hududni yuzaga keltirishadi.

Bu holat menga Franchesko Tottining o'yinini yodga solmoqda. «Roma»da ikki vinger qanotdan raqib jarima maydoniga hujum qilgan paytda, Totti "to'qqizinchi raqamli futbolchi" vazifasini bajarar edi.

Tan olish og'ir, ammo «Liverpul» hozirgi kunda jahondagi eng kuchli hujum chizig'iga ega», — dedi Runi.