Ziko: «Bunyodkor»dan ketmasdan umrim oxirigacha etadigan pul ishlab olishim mumkin edi

Bunyodkor» klubining braziliyalik sobiq bosh murabbiyi Ziko toshkentliklar safidan TsSKAga o'tib ketgani haqidagi xotiralari bilan o'rtoqlashdi.

— Bir necha yillar avval TsSKA klubida ishlagansiz. Hammasi nimadan boshlangandi?

— O'zbekistonda ishlardim, ta'til vaqtida Braziliyaga ketdim va TsSKAning jismoniy tayyorgarlik bo'yicha murabbiyi Palau Payshau menga qo'ng'iroq qildi. U bilan Braziliya terma jamoasi orqali tanish edim. Payshau TsSKA prezidenti men bilan suhbatlashmoqchi ekani haqida aytdi.

— Tezda kelishib oldingizmi?

— O'sha zahotiyoq. Menga taklif berishdi va uni qabul qildim. Hech qanday shubha bo'lmadi, chunki TsSKA — mashhur jamoa. Faqatgina «Bunyodkor»dan ketish qiyin bo'ldi. Juda qiyin. U erda futbol rivoji uchun ko'p ishlar qilingandi. Garchi O'zbekistondagi infrastruktura mukammal holatda bo'lmasa ham. Bu erda esa UEFA Kubogi va Chempionlar Ligasi darajasiga ko'tarilish imkoniyati tug'ildi. Bu men uchun puldan muhim edi.

— TsSKAda maoshingiz kamaydimi?

— Ha, O'zbekistonda qolishim va umrim oxirigacha etadigan pul ishlashim mumkin edi, biroq men uchun futbol darajasi yuqoriroq edi. O'zbekistonda jamoa bilan to'rt oy ichida mamlakat chempionligi va Kubogini qo'lga kiritdik, Osiyo Chempionlar Ligasi finaliga chiqishimizga hakamlarning xatosi to'sqinlik qilib qoldi, — deydi Ziko.

Ma'lumot uchun, Ziko 2008 yilning kuzida «Bunyodkor» bosh murabbiyi etib tayinlanadi. U Mirjalol Qosimovning o'rnini egallaydi. Biroq 2008 yilgi mavsum yakunlangach TsSKAga yo'l oladi. 2009 yilning yozida esa «Bunyodkor» yana bir braziliyalik afsonaviy murabbiy Luis Felipe Skolarini olib keladi.

Manba: daryo.uz