Odil Ahmedovning «Shangxay SIPG»dagi maoshi qisqarishi mumkin

Xitoy superligasi koronavirus pandemiyasi tufayli yuzaga kelgan vaziyat tufayli klublar tomonidan berilgan maoshlarni qisqartirish borasidagi taklifni tasdiqladi.

Xitoyda mavsum 22 fevral kuni boshlanishi kerak edi, ammo pandemiya tufayli chempionatining boshlanishi noma'lum muddatga qoldirildi.

«Koronavirus pandemiyasi tufayli Xitoyning barcha professional ligalarida mavsumning boshlanishi keyinroqqa qoldirildi. Natijada klublar va ularning homiylari moliyaviy qiyinchilikka duch kelishdi. Klublarga bo'lgan bosimni pasaytirish va futbolchilar maoshini kamaytirish hozirgi palladagi to'g'ri qaror bo'lar edi.

Barcha manfaatdor tomonlar vaziyatni diqqat bilan o'rganib chiqishganidan keyin maoshlarni qisqartirishga rozi bo'lishdi. Klublar va o'yinchilar o'rtasidagi muzokaralardan so'ng ushbu chora amalda qo'llaniladi. Maoshlarni qisqartirish 31 mart sanasidan 2020 yilgi mavsum boshlanguniga qadar amalda bo'ladi», — deya bayonot tarqatdi Xitoy futbol federatsiyasi.

Eslatib o'tamiz, Xitoyning "Shangxay SIPG" sharafini o'zbekistonlik yarim himoyachi Odil Ahmedov himoya qilmoqda. Ma'lumotlarga qaraganda, Ahmedovning o'z jamoasidagi yillik maoshi 5 mln evroga teng.