Ronaldino turmadan chiqish oldidan mahkumlardan sovg'a oldi

Paragvay poytaxti Asunsondagi qamoqxonasidagi mahkumlar turmadan chiqib ketayotgan Ronaldino sovg'a hozirlashdi.

Braziliyalik sobiq futbolchi va uning akasi uy qamog'iga o'tkazilishidan xabar topgan mahkumlar ularga barbekyu tayyorlab berishdi.

Ronaldino turmada o'tirgan bir oy davomida u erdagilar bilan yaqin bo'lib ketdi. U qamoqxonani tark etish chog'ida mahkumlar ko'zyoshlarini tiya olishmadi. Bundan hayratga tushgan Ronni Braziliyaga qaytish oldidan ularni kelib ko'rishga va'da berdi.

Eslatib o'tamiz, Ronaldino 7 aprel kuni 1,6 million evro evaziga uy qamog'iga o'tkazildi. U soxta pasport bilan Paragvayga kirgani uchun hibsga olingan edi.