Karantinni katta futbol bilan o'tkazayotgan Jasur, xayriyalarga qo'l urgan Shukurov va Ahmedovlar. Mashhur sportchilar karantinni qanday o'tkazmoqda?

Xabaringiz bor, joriy yilning avvalidan butun dunyo bo'ylab koronavirus pandemiyasining tarqalishi sabab ommaviy tadbirlar, jumladan, sport musobaqalari ham bekor qilinmoqda.

Shu tufayli ko'plab sport yulduzlari ham oddiy aholi singari karantin davrini o'z uylarida o'tkazishmoqda. Joriy yilning 16 martidan boshlab O'zbekistonda ham barcha sport musobaqalari bekor qilindi. Shu boisdan, milliy terma jamoa a'zolari ham o'quv-yig'in mashg'ulotlari bekor qilingach, o'z uylarida karantin qonun-qoidalariga ko'ra masofadan turib mashg'ulotlar o'tkazmoqda.

Har bir sportchi ayni damda maxsus nazorat ostida trenerlarning ko'rsatmalari asosida ish olib borishmoqda. Shunday bo'lsa-da, mashhur sportchilarning karantin davridagi hayoti ko'pchilik uchun qiziq. Buni inobatga holda O'zbekiston sporti yulduzlarining o'z uylarida nimalar bilan band ekanligiga to'xtalib o'tishga qaror qildik.

Ayni paytlarda katta sportdan uzilmagan holda musobaqalarda ishtirok etayotgan kam sonli o'zbekistonliklardan biri bu Jasur Yaxshiboevdir. Hamyurtimiz futbol bo'yicha butun Evropa qit'asi bo'yicha to'xtatilmagan yagona chempionat Belorus oliy divizioni klubida to'p surmoqda.

E'tiborlisi, iqtidorli futbolchimiz butun dunyo futbol ixlosmandlari muxlislik qilayotgan ushbu chempionatda jamoasi “Energetik-BGU” bilan 3 ta tur o'yinida qatnashdi va musobaqada ochko yo'qotmagan yagona jamoa sifatida turnir yakka peshqadami bo'lib turibdi.

Har uchchala o'yinda asosiy tarkibda maydonga tushgan Yaxshiboev raqiblari darvozasini uch marta ishg'ol qilgan holda to'purarlar poygasida ham birinchi o'rinda joylashgan. Shuningdek, iqtidorli futbolchimiz hisobida bitta samarali to'p uzatmasi ham bor.

“Energetik-BGU” jamoasi safida Jasur Yaxshiboevdan tashqari Shohboz Umarov ham harakat qilmoqda. Umarov hozircha jamoasining o'yinlariga zaxiradan qo'shilmoqda. Umid qilamizki, tez kunlarda bu hamyurtimiz ham samarali o'yinlari bilan muxlislar mehrini qozona oladi.

Koronavirus balosi butun dunyoga Xitoydan tarqagan edi va birinchilardan bo'lib bu davlatda karantin davri joriy qilingandi. Ammo bugungi kunga kelib xitoyliklar virus ustidan g'alaba qozonish arafasida turibdi. Hattoki tez kunlarda Xitoyda sport musobaqalari o'tkazilishi jarayonlari qayta tiklanadi.

Futbol bo'yicha O'zbekiston milliy terma jamoasi sardori Odiljon Ahmedov ijtimoiy tarmoqdagi sahifasida ma'lum qilishicha, futbol bo'yicha Xitoy chempionatining bu yilgi mavsumiga keyingi oyning boshida start berilishi kutilmoqda.

Ayni paytda karantin davrini Xitoyda o'tkazayotgan Odiljon Ahmedov koronavirusni engishda yordam ko'rsatish maqsadida o'z hisobidan O'zbekistonga ikki marta katta xayriyani amalga oshirdi. Dastlab, Namangan viloyati aholisi uchun 600 mln so'm miqdorida mablag'larni xayriya sifatida taqdim qilgan bo'lsa, keyinchalik futbolchimiz Xitoydan turib mamlakatimizga yirik miqdordagi tibbiy mahsulotlaridan iborat insonparvarlik yukini jo'natdi.

Avvalroq, Odilning aka-ukalari Namangandagi muhtoj oilalarga oziq-ovqat mahsulotlarini tarqatgani haqida ma'lum qilingan edi.

Xayriya ishlari terma jamoamizning boshqa bir a'zosi Otabek Shukurov tomonidan ham amalga oshirilgandi. “Sharja” klubi futbolchisi BAAning amaldagi chempioni Shukurov karantin davrini o'zi tug'ilib o'sgan Chiroqchi tumanida oilasi davrasida o'tkazmoqda.

Futbolchimiz Chiroqchi ahli uchun 100 mln miqdordagi oziq ovqat mahsulotlarini tarqatgandi.

Hozirgi paytdagi O'zbekiston milliy terma jamoasining eng kuchli futbolchilaridan bo'lib turgan Eldor Shomurodov ham karantin tufayli Rossiyada qolib ketgan “Bunyodkor” klubi o'smirlar jamoasiga yordam berdi.

“Bunyodkor” klubining 2004 yilda tavallud topgan futbolchilardan tashkil topgan jamoasi har yili an'anaviy tarzda tashkillashtiriladigan IX Sergey Igorevich Vaxrushev xotira turnirida ishtirok etish uchun Rossiyaning Krasnodar shahriga tashrif buyurgan. Ammo, 17 mart kuni Rossiya sport vazirligi mamlakat hududida har qanday xalqaro musobaqalarni o'tkazishni taqiqladi va xotira turniri ham shu qarorga ko'ra bekor qilindi.

Musobaqaning tugashini inobatga olagn holda Rossiyadan qaytish chiptalari keyinroqqa olingani bois futbolchilar bir necha kun davomida Rossiyada qolib ketdi. Jamoa bir muddat Krasnodarda bo'ldi va Rostovga ko'chib o'tdi. Yosh futbolchilar bir necha kun davomida mehmonxonada istiqomat qilishgan.

Ma'lum bo'lishicha, Eldor o'z hisobidan yosh futbolchilarga yordam bergan hamda jamoa a'zolariga Rostovdan Moskvaga borish chiptalarini olib bergan. So'ngra “Bunyodkor-2004” vakillari O'zbekiston hukumati tomonidan tashkil etilgan charter reys orqali Moskvadan O'zbekistonga olib kelindi.

Rio-2016 Olimpiadasi g'olibi, hozirda professional boksda faoliyatini davom ettirayotgan Fazliddin G'oibnazarov ham karantin davrini o'z uyida o'tkazmoqda.

Shahobiddin Zoirov o'zining ijtimoiy tarmoqlardagi sahifasiga ushbu rasmni joyladi. Musobaqalar va mashg'ulotlardan bo'shamaydigan sportchilar endi o'z oilalariga ko'proq vaqt ajratish imkoniyatiga ega bo'lishmoqda.

Karantindan oldin Murod Xonto'raevning yana katta sportga qaytayotgani haqida xabarlar yangragan edi. Ammo, hozircha sportchimiz karantinni o'z uyida ishdan va sportdan uzilmagan holda o'tkazmoqda.

Rio-2016 Olimpiadasi g'olibi, hozirda professional boksda faoliyatini davom ettirayotgan Hasanboy Do'smatov karantin davrida ham mashg'ulotlardan bo'shamayapti. U prof boksda ham hammani tiz cho'ktirmoqchi.

Professional boksda ajoyib natija qayd etayotgan bokschimiz Qudratillo Abduqahhorov hozir niqobda. U keyingi raqibni er tishlatish uchun mashg'ulotlarda bor kuchi bilan ishlamoqda. Niqob viruslarga xalaqit berish uchun. U bizning kuchli bokschimizga rejalarini amalga oshirishda xalal bera olmaydi.

Havaskor boksda Osiyo chempioni, Osiyo o'yinlari g'olibi va jahon chempionati kumush medali sohibi Iqboljon Xoldorov Olimpiya o'yinlarida ishtirok etmaydi. U balki prof boksda o'z omadini sinab ko'rar. Ammo, hozir karantin. Yaxshisi u mashg'ulotlarga zo'r berishi kerak.

Jahon chempionatining kumush medali sovrindori Dilshod Ro'zmetov Olimpiya o'yinlari uchun o'tkazilgan kvalifikatsion turnirda omadsizlikka uchragan edi. Ammo, unga murabbiylar ishonmoqda. Ikkinchi imkoniyatni qo'ldan chiqarmaslik uchun yanada kuchli bo'lish lozim.

Nufuzli musobaqalarda biroz omad etishmaydigan bokschimiz Elnur Abduraimov karantin davrida mashg'ulotlarga zo'r bergan. U Tokio olimpiadasida omadni ham jilovlamoqchi.

Jismoniy tarbiya va sport vazirligi
Matbuot xizmati

Manba: minsport.uz