London meri «Arsenal», «Chelsi» va «Tottenxem»dan yordam so'radi

London meri Sodiq Omon Xon koronavirusga qarshi kurashda poytaxt klublaridan yordam so'radi.

Siyosatchi «Arsenal», «Chelsi», «Tottenxem», «Vest Xem» va London shahrining yana 7ta jamoasiga murojaat qilib, klub tizimida ishlayotgan tibbiyot xodimlarini COVID-19 pandemiyasiga qarshi kurashga jalb qilishda yordam so'radi. Shuningdek, u klublardan stadionlar va jamoa qarorgohini Buyuk Britaniya sog'liqni saqlash xizmati xodimlariga taqdim etishni so'radi.

«Men bunday masalalarga engil qaramayman. Ishonchim komil, bunday og'ir pallada London jamoalari ushbu masalaga jiddiy yondashishadi. Shifokorlarni qo'llab-quvvatlash va londonliklar hayotini himoya qilish uchun biz birlashishimiz kerak», – deya yozdi Xon.

«Tottenxem» sog'liqni saqlash xizmatiga o'z shifokorlarini taqdim etdi, «Chelsi» shifokorlarning «Millenium» oteliga joylashishiga ijozat berdi, «Arsenal» esa tibbiyot xodimlariga xizmat ko'rsatish uchun o'z avtomobillarini berdi.