Tokio-2020 1 yilga surildi. Dzyudo bo'yicha Toshkentdagi JCh-2021 nima bo'ladi?

Xalqaro dzyudo federatsiyasi prezidenti Marius Vizer ijtimoiy tarmoqlar orqali tez-tez muxlislarni qiziqtirgan savollarga javob berib turadi. Janob Vizer kecha tvitterdagi sahifasida dzyudo muxlislarini qiziqtirgan bir qator savollarga javob berib o'tdi. E'tiboringizga ular orasida qiziqarli bo'lgan ba'zi savol-javoblarni havola qilamiz.

– Janob Vizer, Olimpiya o'yinlari 2021 yilga kechiktirildi. Bu 2021 yil O'zbekistonda o'tishi kerak bo'lgan jahon chempionatini 2020 yilga ko'chirishi mumkinmi? Aytmoqchimanki, 2020 yil oktyabrdagi Toshkent Gran-prisi JChga aylanib ketishi ehtimoli bormi?
– Hozir biz uchun mutlaqo yangi vaziyat. Albatta, vaziyat iziga tushgach, Olimpiya saralash musobaqalari va boshqa turnirlar taqvimini qaytadan ko'rib chiqamiz.

– Dzyudoda Tokio-2021 uchun saralash tizimi qanday bo'ladi endi?
– Tez orada Xalqaro Olimpiya qo'mitasi bizga yangi yo'riqnoma beradi. COVID-19 pandemiyasiga barham berilgach, biz ham yangi strategiya va taqvim ishlab chiqamiz.

– 2024 yilgi Parij Olimpiadasi ham Tokioda bo'ladigandek 1 yilga surilishi mumkinmi?
– Tokio Olimpiadasining surilishini hozirgi kundagi vaziyat nuqtai nazaridan to'g'ri qaror deb bilaman. Bunday qarorga kelish oson bo'lgani yo'q. O'ylaymanki, 2024 yilda barchasi yaxshi bo'lib tursa, Parij Olimpiadasi o'z vaqtida o'tadi.