«Samuraylar»ning O'zbekistonga qarshi rasmiy mashg'ulotidan foto+video!

Bugun, 16 yanvar kuni Yaponiya terma jamoasi O'zbekistonga qarshi o'yin oldidan Al-Ayn shahridagi “Xalifa Bin Zayid” stadionida rasmiy mashg'ulotlarini o'tkazdi.

“F” guruhida birinchi o'rinni aniqlab beradigan o'yin oldidan o'tkazilgan mashg'ulotlar OAV vakillari uchun ochiq bo'ldi.

Jumladan, raqiblarimizning mashg'ulotlarini Stadion.uz muxbiri Akmal Eshonxonov bevosita stadiondan turib kuzatdi.

Akmal Eshonxonovning aytishiga ko'ra, yaponiyaliklar asosiy e'tiborni jarima zarbalarini amalga oshirish, uzoq va qisqa paslarni to'g'ri tashkillashtirishga qaratishgan. Shuningdek, raqib futbolchilari chiniqish, tez yugurish hamda ko'ngilochar mashqlarni ham ado etishdi.

Jamoa bosh murabbiyi Xadzime Moriyasu ertaga katta ehtimol bilan asosiy tarkib futbolchilariga dam berishi kutilmoqda.

Ammo murabbiy bugungi matbuot anjumanida, futbolchilaridan faqat g'alaba uchun maydonga tushishlari va oddiy g'alaba qozonishni talab qilishini ta'kidladi.

Quyida Yaponiya terma jamoasining mashg'ulotlaridan olingan fotosuratlar hamda videoni e'tiboringizga havola qilamiz. Video 15 yanvar kuni suratga olingan.