Oliy xokkey ligasidagi tanaffus 10 aprelga qadar uzaytirildi

Oliy xokkey ligasi (VXL) pley-off bosqichi o'yinlaridagi tanaffusni 10 aprelga qadar uzaytirdi.

Koronavirusning keng tarqalib borayotgani sababli mamlakatlarda cheklov choralari qo'llanilgani tufayli shunday qarorga kelishdi. Avvalroq VXL 24 martga qadar pley-off bosqichini to'xtatgan edi.

«Liga yuzaga kelgan vaziyatni kuzatib boryapti va musobaqani davom ettirishning turli variantlarini ko'rib chiqmoqda. Pley-off bosqichini oxiriga etkazib, g'olibni aniqlash muhim ahamiyatga ega», — deyiladi bayonotda.

Eslatib o'tamiz, "Humo" klubi chorak final bosqichi doirasida «Zvezda»ga qarshi to'rtta o'yinni o'tkazib bo'ldi. Hozircha toshkentliklar ortda qolishmoqda — 1:3. Jamoalar o'rtasidagi beshinchi bahs raqib maydonida o'tkazilishi kerak.