Qora mehnatdan qadr top(ma)ganlar (2-qism)

Stadion.uz tarixga nazar soladi va APLda chempionlik uchun barchadan ko'p xissa qo'shganiga qaramay, muxlislari e'tiboridan chetda qolgan futbolchilar bilan tanishtirib o'tadi. Bugungi qahramonlarimiz ijtimoiy tarmoqlar yoki shov-shuvli intervyulardan yiroq, lekin jamoa uchun katta naf keltirganlar ekanligini anglangan bo'lsangiz, ajab emas.

2011-2012. Pablo Sabaleta, "Manchester Siti"

“Shaharliklar”ning katta tanufusdan so'ng, yana taxtga qaytishi muxlislarni quvontirgani bor gap. O'sha mavsumda Pablo Mika Richards bilan o'ng qanotda sog'lom raqobat qildi,mavsumning katta qismini asosiy tarkibda o'tkazdi. Qahramonimiz o'sha yili “Siti”ning chempionligi uchun eng katta yordam berganlardan biri desak, hayron bo'lmang. So'nggi turda “KPR” (3:2) ustidan qozonilgan g'alabada Sabaletaning o'rni beqiyos. O'sha uchrashuv yodga olinsa, ko'pchilik Agueroning golini eslaydi. Shunga qaramay, o'sha oqshomda argentinalik himoyachining goli aslida barcha ishga tamal toshini qo'ygani bilan hech kimning ishi yo'q.

2012-2013. Xaver Ernandes, "Manchester Yunayted"

O'sha yili barcha Robin van Persining gollariga mahliyo bo'lib qolgan va meksikalik yigitning mehnatini qadrlamagan desak, adashmagan bo'lamiz. Darhaqiqat, Ernandes o'sha mavsumning bir nechta (“Chelsi”, “Nyukasl”, “Suonsi”, “Aston Villa”) o'yinida hal qiluvchi gollarni kiritgani yodingizdami? “Manchester Yunayted” qanchalar kuchli bo'lmasin, o'sha uchrashuvdagi g'alabalar bo'lmaganida chempionlik ham bo'lmas edi.

2013-2014. Edin Jeko, "Manchester Siti"

“Shaharliklar”ning chempionligi bilan yakunlangan musobaqada Yaya Ture 24 ta gol bilan qahramon bo'lgani rost. To'g'ri, yarim himoyachining g'oliblik uchun qo'shgan xissasi ulkan, biroq chempionlik uchun Edin Jeko ham undan kam harakat qilmagan. Aynan bosniyalik hujumchining gollari yakunda hal qiluvchi g'alabalarni keltirganini untmaslik lozim.

2014-2015. Branislav Ivanovich, "Chelsi"

Joze “aristokratlar”ning chempionligi uchun Eden Azar va Diego Kostadan unumli foydalangani haqida uzoq so'zlash mumkin. Shuningdek, Jon Terri ham o'sha mavsumda ajoyib o'yin ko'rsatgan edi. London klubi o'sha mavsumda hujumdan ko'ra himoyada yaxshiroq harakat qilgani bois ham Jon Terri ko'plab maqtovlarga loyiq ko'rilgan edi. Shu o'rinda unutmaslik lozim-ki, Branislav Ivanovich ham butun mavsum davomida himoyada mehnat qilgan va chempionlik uchun yuqorida nomi zikr qilingan futbolchilar singari jon kuydirganini aksariyat muxlislar yodga olishmaydi.

2015-2016. Sindzi Okazaki, "Lester"

Yaponiyalik futbolchi “Lester ertagi”ning bosh qahramoni bo'lmagan. U Vardi yoki Mahrez singari barchani hayratda qoldirmagan. Shunga qaramay, aynan Okazakining maydondagi mehnatkashligi sababli Jeymi Vardi katta bo'shliqqa ega chiqqani bilan hech kimning ishi yo'q. E'tibor bersangiz, Okazakining maydondagi foydali harakatlari chempionlik mavsumida qolganlarnikidan sezilarli darajada ko'proq ekanligini anglaysiz. Okazakining to'p bilan muomalada bo'lishi va kiritgan gollari haqida-ku so'zlamasak ham bo'ladi.

2016-2017. Pedro, "Chelsi"

Sening jamoadoshlaring Azar va Kosta singari futbolchilar bo'lsa, muxlislar e'tiboridan umid qilmasa ham bo'ladi. Misol uchun Pedro ham Konte boshchiligidagi “Chelsi”ning chempionligida barchadan ko'proq ter to'kkanlardan biri sanaladi. 9 ta gol va 10 ta assist. Uning maydondagi intensiv o'yini, jamoaviy pressing va pozitsion hujumlarda keltirgan foydasini ko'pchilik yodga olmasligi aniq.

2017-2018. Fernandino, "Manchester Siti"

So'zsiz Fernandino chempionlik mavsumida jamoaning eng muhim futbolchisi bo'lgan. O'sha yili barcha Gvardiolaning taktikasi, hujumdagi rang-baranglikdan zavq olgan bir paytda, Fernandino hujumda ham himoyada ham birdek ter to'kkani bilan hech kimning ishi yo'q. Buni hatto Pep Gvardiolaning o'zi ham bir necha bor intervyularida ma'lum qilgan.

2018-2019. Emerik Lyaport, "ManchesterSiti"

“Siti”ning chempionligi bilan yakunlangan mavsumda barcha Virjilning o'yinlaridan zavq olgan edi. Agar statistikaga e'tibor qaratsangiz, Emerik van Deykdan hech qaysi jabhada qolishmagan. Uning ishonchli o'yini va birinchi paslari evaziga “shaharliklar” chempionlikni qo'lga kiritgan bo'lsada, mashhurlik va e'tibor gollandiyalik futbolchiga o'tib ketdi. Emerikning yo'qligi bu mavsumda “Siti”ga qanchalar qimmatga tushganiga barchamiz guvoh bo'lib turibmiz.

Manba: Stadion.uz

Xo'sh, sizningcha ushbu mavsumda chempionlikni qo'lga kiritishga yaqin turgan “Liverpul” safida “ko'rinmas qahramon” vazifasini kim bajarmoqda?