«Milan» hujumchisi yirik miqdorda kompensatsiya puli to'laydigan bo'ldi

Sport arbitraj sudi (CAS) «Milan» hujumchisi Rafael Leauga sobiq jamoasi — «Sporting» foydasiga 16,5 mln evro kompensatsiya mablag'ini to'lash vazifasini yukladi.

Chunki portugaliyalik futbolchi 2018 yilning noyabr oyida lissabonliklar bilan tuzilgan shartnomani bir tomonlama bekor qilib, shundan so'ng erkin agent sifatida Frantsiyaning «Lill» safiga o'tib ketgan edi. 20 yoshli futbolchi 2019 yilning yozida 35 million evro evaziga «Milan»ga kelib qo'shildi.

Shartnoma bir tomonlama bekor qilingani uchun «Sporting» CASga murojaat qilib, 45 million evro kompensatsiya mablag'ini undirish haqida so'rov kiritdi. Ammo sud futbolchining transfer bozoridagi hozirgi narxini inobatga olib, klub foydasiga 16,5 mln. evro undirish haqida qaror chiqardi.