Xadzime Moriyasu: «Ertaga yigitlardan shunchaki g'alaba uchun o'ynashlarini so'rayman»

Ertaga bo'lib o'tadigan Yaponiya – O'zbekiston uchrashuvidan oldin o'tkazilgan matbuot anjumanida bosh murabbiy Xajime Moriyasuga hamda futbolchi Toshixiro Aoyama o'z fikrlarini bildirib o'tdi.

“Ertaga jiddiy raqib sanalmish, O'zbekiston termasi bilan o'ynaymiz. Ushbu o'yin guruhda kim birinchi o'rinni olishini aniqlab beradi. Albatta, Yaponiya g'alaba qozonishni istaydi. Tayyorgarliklar yaxshi olib borildi, nimchorak finalga birinchi o'rin bilan chiqishimiz kerak.

BAAga kelishdan avval guruhda birinchi o'rinni olishni maqsad qilgan edik. Ammo ertangi o'yinda futbolchilarga ortiqcha bosim bo'lishini istamayman. Ulardan shunchaki g'alaba qozonishlarini so'rayman. Biz xotirjammiz. Asosiy maqsad esa musobaqada chempion bo'lish.

Avstraliyaga to'g'ri kelishdan cho'chimaymiz. Yaponiya musobaqada barcha raqib bilan teng kurashishni istaydi. Biz chempion bo'lishni istayapmizmi?, demak har bir o'yinda g'alaba qozonish kerak. Musobaqaning pley-off bosqichiga deyarli kuchsiz raqib chiqmaydi.

Musobaqaga kelgan barcha futbolchilarimni sinab ko'raman. Zaxirada qolgan futbolchilarning ham holati yaxshi. Ko'ramiz, kim o'yinga tayyor bo'lsa, o'sha ertaga maydonga tushadi. Bugun futbolchilarga so'nggi ko'rsatmani beraman.

Futbolchilarimning jismoniy holati ikki xil edi. Chunki terma jamoaning yarim a'zolari Yaponiyada, qolganlari esa Evropa chempionati klublarida o'ynaydi. Ular bilan birgalikda mashg'ulot o'tkazganimizdan keyin barchaning holati tenglashgan deb o'ylayman. Ortda qolgan ikkita o'yindan o'zimizga xulosa chiqardik. Xatolar haqida gapirishni istamayman.

Yana bir bor aytaman maqsad faqat chempion bo'lish. Kundan-kunga jamoani rivojlantirib, kamida 7 marta 90 daqiqa o'yin o'tkazib, finalda g'alaba qozonish shart. Yaponiya raqiblarini birdek ko'radi, ularni ajrata olmayman.

O'zbekistonga qarshi o'yinga guruh bosqichidagi ikki o'yindan kelib chiqib, taktika ishlab chiqamiz. Asosiy tarkibda ba'zi futbolchilar almashishi mumkin. Lekin shunday bo'lsada, ertaga faqat g'alaba uchun o'ynaymiz.

“O'zbekiston bilan o'yinga yaxshi tayyorlandik. Ruhan va jismonan holatimiz joyida. Bosim? Yo'q, hech qanday bosimni his qilmayapmiz. Ertaga ajoyib o'yin bo'ladi deb umid qilaman”, deydi yaponiyalik yarim himoyachi Toshixiro Aoyama.

Ma'lumot o'rnida, ertaga Yaponiya terma jamoasi ko'k rangli libosda, O'zbekiston esa oq rangli libosda harakat qiladi. O'yin Al-Ayn shahridagi “Xalifa bin Zayd” stadionida Toshkent vaqti bilan soat 18:30 da boshlanadi. Mazkur bahsni BAAlik hakam Muhammad Abdulla Hasan boshqaradi.

Akmalxon Eshonxonov

Al-Ayn shahridan maxsus