Yaponiya darvozaboni: «O'zbekiston bilan o'yin oson bo'lmaydi, ammo biz raqibga ochiq zonalar qoldirmaymiz»

Yaponiyaning “Sagan Tosu” klubi hamda Yaponiya terma jamoasi darvozaboni Syuiti Gonda O'zbekiston bilan o'yin oldidan o'z fikrlarini bildirib o'tar ekan, bo'lajak raqib Osiyo qit'asida eng kuchli jamoalardan biri ekanligini ta'kidladi.

“O'zbekiston – Osiyoda eng kuchli jamoalardan biri hisoblanadi. Ertangi o'yin shunchaki oddiy yoki oson bo'lmaydi. To'pni iloji boricha uzoq vaqt o'zimizda ushlab turishimiz kerak deb o'ylayman.

Shunda raqib hujumda foydalanishi mumkin bo'lgan vaqtni yo'qotadi. Buni so'zda emas balki, ertaga maydonda amalga oshirib ko'ramiz. Ular hujum uyushtirishda tezkorlar, shuning uchun biz raqibga ochiq zonalar qoldirmasligimiz kerak.

Yaponiya nima bo'lgan taqdirda ham Osiyodagi barcha raqiblarini mag'lub eta olishi shart. To'g'ri, Ummonga qarshi o'yinni yaxshi o'tkaza olmadik, oldimizda yaxshilashimiz kerak bo'lgan ko'p kamchiliklar bor.

Shuning uchun bizga qo'yilgan vazifalarni bajarishda davom etamiz va ertaga o'zimizni o'zimiz yangi chaqiriqqa qanchalik tayor ekanligimizni sinovdan o'tkazamiz”, deydi Yaponiya terma jamoasi darvozaboni Syuiti Gonda.

Eslatib o'tamiz, 17 yanvar kuni Osiyo Kubogi guruh bosqichidan o'rin olgan so'nggi tur uchrashuvini O'zbekiston milliy terma jamoasi Al-Ayn shahridagi "Xalifa bin Zayd" stadionida Yaponiyaga qarshi o'tkazadi. Mazkur bahsni BAAlik hakam Muhammad Abdulla Hasan Muhammad boshqaradi.

Akmalxon Eshonxonov

Al-Ayn shahridan maxsus