UEFA Evro-2020ni ko'chirish uchun klublar va Ligalardan katta miqdorda pul talab qilmoqda

UEFA yuzaga kelgan vaziyat tufayli Evro-2020ni boshqa muddatga ko'chirishga tayyor. Ammo ittifoq musobaqani kelasi yilga ko'chirish evaziga klublar va Ligalardan 275 million funt miqdorida kompensatsiya talab qilmoqda. Bu haqda"The Athletic" nashri xabar tarqatdi.

Manbaga ko'ra, UEFA Evropa chempionatini 2021 yilga ko'chirish uchun ketadigan xarajatlarni shunday summaga baholamoqda. Bugun bo'lib o'tgan yig'ilishda tashkilot manfaatdor tomonlarga shunday summa haqida so'z ochmoqchi.

Avval xabar berib o'tilganidek, UEFAga a'zo mamlakatlar vakillari, Evropa klublari assotsiatsiyasi (ECA) va Professional futbolchilar xalqaro federatsiyasi (FIFPro) videomuloqot orqali konferentsiya o'tkazadi va Evro-2020ni ko'chirish masalasida qaror qabul qiladi. Shuningdek, turnirni shu yilning dekabr oyida o'tkazish varianti ham mavjud.

Bundan tashqari, 17 mart kungi majlisda to'xtab qolgan Evropa chempionlar ligasi va Evropa ligasining qolgan qismini o'tkazish masalasi ham muhokama qilinadi.

Klublar va Ligalar qanday qilib bo'lmasin ushbu mavsumni yakunlab qo'yishni niyat qilishmoqda. Chempionatni oxiriga etkazmasdan, hozirgi holatda g'olibni e'lon qilish esa juda ko'p muammolarni yuzaga keltirib chiqaradi.