“O'zbekistonda zaxira borasida muammo yo'q” — Qozog'istonlik mutaxassis o'zbek bokschilari haqida

Qozog'istonda xizmat ko'rsatgan murabbiy Tursung'ali Edilov Ulan-Bator mezbonlik qilgan boks bo'yicha Osiyo chempionatida o'zbekistonlik charm qo'lqop ustalarining ishtirokini yuqori baholadi. Mutaxassisning fikricha, O'zbekiston terma jamoasining kuchi uning “poyoniga etmas” zaxirasida.

Tursung'ali Edilov turnirda Qozog'iston asosiy tarkib bilan 4 ta oltin olgan bo'lsa, O'zbekiston 2-3-raqamli tarkib bilan kelib, 3 ta oltin medalni qo'lga kiritganiga e'tibor qaratdi.

“Bu nimani anglatadi? O'zbekistonda zaxira borasida hech qanday muammo yo'q. Masalan, Madaminov (-65 kg), Erkinboev va yosh Mamasoliev (-90 kg) kabi yigitlar o'ta istiqbolli va raqobatbardosh ekanini ko'rsatdi. Qo'shni mamlakatda deyarli barcha olimpiya vaznlarida ichki raqobat shunchalik kuchliki, yoshlar asosiy tarkibdagi etakchilarga bo'shashishga imkon bermaydi. Bizda esa ba'zi vaznlarda bitta etakchi bor, uning ortida esa bo'shliq”, deydi murabbiy.

Ekspertning ta'kidlashicha, o'zbekistonlik murabbiy va tahlilchilar qozog'istonlik bokschilarning o'yin uslubini sinchkilak o'rganish bo'yicha katta ish olib bormoqda. Bunga misol sifatida Mahmud Sabirxon va Shahzod Muzaffarov o'rtasidagi jangni keltirdi.

“Avvalgi uchta jangda bizning bokschi oson g'alaba qozongan edi. Bu safar esa ikki karra jahon chempioni bo'lgan Mahmud g'alabani tom ma'noda ‘tishlari bilan sug'urib oldi’. O'zbekistonda bokschilarni biznikilarga qarshi janglarga juda jiddiy tayyorlashadi. Bizda esa bunday tahliliy yondashuv etishmayapti. Ular bizni puxta o'rganib bo'lishgan”, deya ogohlantirdi Edilov.

Ma'lumot uchun, O'zbekiston boks terma jamoasi Osiyo chempionatini 3 ta oltin medal bilan yakunladi. Musobaqada ishtirok etgan o'zbekistonlik charm qo'lqop ustalari umumiy hisobda 3 ta oltin, 2 ta kumush va 1 ta bronza medalini qo'lga kiritdi.  Musobaqada to'liq tarkibda (20 nafar bokschi) ishtirok etgan O'zbekiston umumjamoa hisobida Qozog'iston (6 ta oltin, 2 ta kumush, 5 ta bronza) va Hindiston (5 ta oltin, 3 ta kumush, 8 ta bronza) bokschilaridan so'ng 3-o'rinni egalladi.