Didar Durdiev: "Mash'al"ga hali ko'p yordamim tegadi"

“Mash'al” bilan bir yillik shartnoma imzolagan Turkmaniston terma jamoasi hujumchisi Didar  Durdievdan klub matbuot xizmati kichik intervyu oldi.

— “Mash'al”ga qanday kelib qoldingiz, klubga kim taklif etdi sizni?
— Agentim menga O'zbekistondan taklif bo'layotgani haqida aytdi. Men rozi bo'ldim. “Mash'al”ni yaxshi bilaman, klubning OChL da ishtirok etgani, o'zbek futbolidagi mavqei va o'rni borligi, mamlakatning mashhur futbolchilari shu klubda etishib chiqqani bilan yaxshi tanish edim. Shu bosi taklifdan xursand bo'ldim va qabul qildim.

— Yangi jamoangizda debyutingiz biroz omadsiz bo'ldi deb o'ylaysizmi!?
— Menimcha unday emas, “Bunyodkor” bilan bahs biz uchun ham ular uchun ham qiyin bo'ldi. Qolaversa men so'nggi daqiqalarda maydonga tushdim. Menimcha vaqt etarli bo'lmadi. O'ylaymanki hali “Mash'al” klubiga  ko'p yordamim tegadi.

— Bugun Muborakda “Qizilqum”ga maydonga tushasizlar, bu bahs qiziqarli kechishi aniq. Mehmonlar o'tgan ikki turda mag'lub bo'lishdi.

— Bugun qiziqarli bahs bo'ladi. Shu bilan birga tezkor o'tadi. Mehmonlar hech bo'lmaganda durang natijani kutishadi. Bizga esa g'alaba kerak. Nasib etsa muxlislarimizni xursand qilamiz.