"An-Nasr" ustozi Ronalduning safga qaytish sanasini tasdiqladi

Ar-Riyodning "An-Nasr" klubi muxlislari uchun xushxabar: jamoa etakchilari Krishtianu Ronaldu va Sadio Mane tez orada maydonga qaytadi. Jamoa bosh murabbiyi Jorje Jezushning ta'kidlashicha, yulduzli duet xalqaro tanaffusdan so'ng yana safda bo'ladi.

Eslatib o'tamiz, har ikki hujumchi kichik jarohatlar tufayli "Al-Xalej"ga qarshi bahsni (5:0) o'tkazib yuborgan edi. Murabbiylar shtabi Manening sog'lig'i bilan bog'liq vaziyatda tavakkal qilmaslikka qaror qilgan. Biroq aprel oyi boshida ichki chempionat bahslari qayta tiklanishi bilan ular chempionlik poygasida jamoaga yordam berishga tayyor bo'lishadi.

Jorje Jezus: "Bizni oldinda 8 ta final kutmoqda"

Ayni damda "An-Nasr" Saudiya Pro Ligasi jadvalida 67 ochko bilan peshqadamlik qilmoqda va ta'qibchi "Al-Hilol"ni 3 ochkoga ortda qoldirmoqda. Jezushning fikricha, qolgan turlarning har biri jamoa uchun hal qiluvchi ahamiyatga ega:

"Bizni chempionlik uchun kurashda 8 ta "final" kutmoqda. To'g'ri, tanaffus biz yaxshi sport formasiga kirib olgan paytda yuz berdi, ammo maqsadimiz o'zgarmaydi".

Joau Feliksning rekordi va "Al-Najma"ga qarshi bahs

Ronaldu va Mane yo'qligida jamoa jilovini Joau Feliks o'z qo'liga oldi. Oxirgi uchrashuvda dubl qayd etgan portugaliyalik futbolchi joriy mavsumdagi gollari sonini 21 taga etkazdi. Murabbiy Feliksning sermahsulligini alohida e'tirof etib, u Evropaning top-klublarida ham bunday ko'rsatkichlarga erishmaganini aytib o'tdi.

Navbatdagi turda "An-Nasr" turnir jadvalining so'nggi pog'onasidagi "Al-Najma" mehmoni bo'ladi. Mazkur o'yinda jamoa to'liq tarkib bilan maydonga tushishi kutilmoqda.