Rednapp: «Arteta xuddi qizigan tomdagi mushukdek bezovta ko'rindi»

Angliyalik sobiq futbolchi Jeymi Rednapp «Arsenal» ustidagi bosim haqida gapirdi. «Kanonirlar» so'nggi 22 yil ichida ilk bor Premer-liga chempionligini qo'lga kiritishga yaqin turishibdi. Shanba kuni Mikel Arteta shogirdlari o'z maydonida «Everton»ni Viktor Dyokeresh va Maks Doumanning 89 hamda 97-daqiqalarda urgan gollari evaziga mag'lub etishdi (2:0).

«Men chempionlikni yutmaganman, lekin uni boy berish qanday bo'lishini bilaman. Xavotir muxlislarga ham o'tadi. Arteta ochiqchasiga bezovta edi, u xuddi «qizigan tunuka tomdagi mushukdek» ko'rindi, lekin to'satdan Douman chiqdi-da: «Hammasi joyida, men hal qilaman», degandek bo'ldi. Aynan shu holat o'yin taqdirini o'zgartirib yubordi. Boshqalar kuchli bosimga dosh bera olmayotgan bir paytda, uning bunchalik vazminlikni saqlab qolgani aql bovar qilmas darajada», — dedi Rednapp Sky Sports efirida bahs yakunlarini sarhisob qilar ekan.

Eslatib o'tamiz, 16 yoshli Maks Douman Premer-liga tarixidagi eng yosh gol muallifiga aylandi.