Gordon Shirer va Runini tanqid qildi: «O'z ishingizni yaxshiroq bajaring»

«Nyukasl» hujumchisi Entoni Gordon APLning 30-turidan o'rin olgan «Chelsi» ustidan qozonilgan g'alabadan (1:0) so'ng, ekspertlar Alan Shirer va Ueyn Runining tanqidlariga munosabat bildirdi. Ushbu bahsda g'alaba golini aynan Gordon kiritgan edi.

Avvalroq Shirer va Runi futbolchining UEFA Chempionlar Ligasi doirasida «Barselona»ga qarshi o'yinni o'tkazib yuborishiga sabab bo'lgan kasalligiga shubha bilan qarashgan edi.

Gordon ularning gaplarini «to'liq bema'nilik» va «mutlaqo ahmoqlik» deb atadi va «uch kun davomida to'shakda yotib, shu sababli mashg'ulotlarni o'tkazib yuborganini» tushuntirdi. Uning so'zlariga ko'ra, u «Barselona» bilan o'yinga asosiy tarkibda tushish umidida kelgan, biroq murabbiy boshqacha qarorga kelgan, deya xabar beradi Metro.

Shuningdek, futbolchi Ueyn Runining «Gordon ekspertlar oldidan o'tib ketayotib, ular bilan qo'l berib ko'rishmadi» degan so'zlarini ham rad etdi. Gordonning fikricha, ekspertlar «o'z ishlarini yaxshiroq bajarishlari» lozim.