Markus Reshford Kataloniyada qoladimi? «Barselona»ning «B» va «V» rejalari ma'lum bo'ldi

«Barselona» hujumchi Markus Reshfordning jamoada qolishini istamoqda. Kataloniyaliklar angliyalik futbolchi bilan shartnoma shartlarini kelishib bo'lishgan, biroq «Manchester Yunayted» bilan muzokaralar hali yakunlanmagan — «qizil iblislar» tovon puli sifatida belgilangan 30 million evroning to'lanishini talab qilishmoqda.

«Barselona» 28 yoshli Reshfordning transfer summasini kamaytirishga yoki hech bo'lmaganda ijara muddatini uzaytirishga harakat qilmoqda. Bu haqda jurnalist Ben Jeykobsga tayangan holda The Touchline nashri xabar bermoqda.

Agar «Barselona» «Manchester Yunayted» bilan kelisha olmasa, kataloniyaliklarda «B rejasi» va «V rejasi» mavjud — bular «Chelsi»ning 26 yoshli a'zosi Pedru Netu hamda «Betis»ning 24 yoshli futbolchisi Abde Ezzalzulidir.