Deklan Rays "Arsenal"ning eng ko'p maosh oluvchi futbolchilaridan biriga aylanishi mumkin

Londonning "Arsenal" klubi yarim himoyachi Deklan Rays borasida bir qarorga keldi. "To'pchilar" futbolchini jamoada saqlab qolmoqchi va u bilan yangi shartnoma bo'yicha muzokaralarni boshlab yuborishdi. Bu haqda BBC sayti xabar bermoqda.

"Arsenal"ning Rays uchun tayyorlagan taklifi ish haqini oshirishni o'z ichiga oladi. Agar mehnat kelishuvi imzolansa, yarim himoyachi jamoaning eng yuqori haq to'lanuvchi futbolchilaridan biri sifatidagi maqomini mustahkamlaydi. Qayd etilishicha, muzokaralar ayni damda dastlabki bosqichda.

27 yoshli Raysning amaldagi shartnomasi 2028 yilning o'rtalarigacha mo'ljallangan bo'lib, unda kelishuvni yana bir mavsumga uzaytirish imkoniyati ham mavjud. Deklan Rays "Arsenal" safida jami 144 ta o'yin o'tkazdi. Ushbu bahslarda yarim himoyachi 20 ta gol urdi va sheriklariga 31 ta golli uzatmani amalga oshirdi.