Mourino jazoga tortildi

Mourino «Portu»ga qarshi o'yinda chetlatilganidan keyin jarimaga tortildi va diskvalifikatsiya qilindi.

Portugaliya futbol federatsiyasining (FPF) Intizom qo'mitasi Joze Mourinoga umumiy qiymati 5 ming evrodan ortiq bo'lgan ikki jarima tayinladi.

«Benfika» bosh murabbiyi «Portu»ga qarshi o'yinda (2:2) chetlatilgani va «ajdarlar» jamoasi murabbiyi yordamchisi Lucho Gonsales bilan mojaro keltirib chiqargani uchun jazolandi.

Qizil kartochka olgani uchun Mourino 1 530 evro, Lucho Gonsales bilan tortishuvi uchun esa 3 825 evro jarima to'lashi kerak.

«O'z jamoasi gol urganidan so'ng u ataylab texnik hududni tark etdi, provokatsion harakat qilish maqsadida raqib jamoa zaxira o'rindig'i tomon yugurdi va to'pni tribunalar tomon tepdi. Bu esa ikki jamoa zaxira o'rindiqlari o'rtasida mojaro kelib chiqishiga sabab bo'ldi», — deyiladi bosh hakam Joau Pineyruning o'yin bo'yicha hisobotida.

Portugaliyalik mutaxassis shuningdek 11 kunga va bir o'yinga diskvalifikatsiya qilindi. U shanba kuni «Aroka»ga qarshi o'yinni o'tkazib yuboradi.

«Benfika» klubi Joze Mourinoga nisbatan qo'llanilgan ikki jazo bo'yicha apellyatsiya berilishini e'lon qildi.

«Benfika» Portugaliya futbol federatsiyasi Intizom qo'mitasi tomonidan murabbiyimiz Joze Mourinoga nisbatan qo'llanilgan jazoni qat'iy va ikkilanmasdan qoralaydi.

Bu o'yin tugaganidan keyin aslida sodir bo'lgan voqealarga zid ravishda qabul qilingan ochiqchasiga adolatsiz va mutanosib bo'lmagan qarordir. Murabbiy o'yindan keyingi matbuot anjumanida tushuntirganidek va keng tarqalgan videolavhalar ham tasdiqlaganidek, «Benfika» murabbiyi golni nishonlash paytida to'pni shunchaki tribunalar tomon tepgan, bu avval ham kuzatilgan holat bo'lib, hech qanday hurmatsizlik ko'rsatish yoki kimnidir provokatsiya qilish niyati bo'lmagan.

Faktlar ochiq-oydin bo'lishiga qaramay, voqea kontekstini buzib ko'rsatadigan, berilgan izohlar va videolarda aniq ko'rinib turgan holatlarni inobatga olmaydigan jazo qo'llanilishi tushunarsiz. Yana ham muhimi, chetlatishdan keyin kiyim almashtirish xonalariga olib boradigan tunnelda Lucho Gonsales tomonidan Joze Mourinoga qilingan provokatsiyalar etarlicha baholanmagan.

«Benfika» bu qarorni chuqur adolatsiz va asossiz deb hisoblaydi. Shuning uchun klub mavjud barcha imkoniyatlar orqali qaror ustidan shikoyat qilish niyatida. Klub haqiqat tiklanishiga va adolat qaror topishiga ishonadi.

Klub yana bir bor bosh murabbiy Joze Mourinoni to'liq qo'llab-quvvatlashini bildirib, Portugaliya futbol federatsiyasi Intizom qo'mitasining navbatdagi afsuslanarli qaroriga qaramay, sport adolati va o'z mutaxassislariga bo'lgan hurmatni qat'iy himoya qilishini ta'kidladi», — deyiladi klub bayonotida.