«Manchester Yunayted» safida yana bir Fernandesh paydo bo'lishi mumkin

«Vest Xem» yarim himoyachisi Mateush Fernandesh yozgi transfer oynasida klubni tark etishi mumkin. Jurnalist Aleks Krukning xabar berishicha, agar «bolg'achilar» Premer-ligadagi o'rnini saqlab qola olishmasa, portugaliyalik futbolchi o'zini sotishlarini talab qiladi. 21 yoshli o'yinchiga asosiy da'vogarlardan biri «Manchester Yunayted» bo'lib turibdi, shuningdek, boshqa klublar ham vaziyatni kuzatib borishmoqda.

«Transfermarkt» portali bahosiga ko'ra, Mateush Fernandeshning qiymati 35 mln evroni tashkil etadi. O'tgan yilning avgust oyida «Vest Xem» futbolchini «Sautgempton»dan 44 mln evro evaziga sotib olgan edi. Joriy mavsumda xavbek London jamoasi safida barcha turnirlarda 32 ta o'yin o'tkazib, 4 ta gol va 4 ta golli uzatmani o'z hisobiga yozdirib qo'ydi.