“Real”dan uchralgan mag'lubiyat “Man Siti” futbolchilarini shok holatiga tushirdi — manba

Evropa Chempionlar Ligasi 1/8 final bosqichi doirasida Madridning “Real” klubiga qarshi o'yinda 0:3 hisobida mag'lub bo'lgan “Manchester Siti” futbolchilari uchrashuvdan so'ng chuqur tushkunlik holatiga tushib qolgan. Bu haqda Daily Mail nashri xabar berdi.

Manbaga ko'ra, o'yin tugagach, “shaharliklar” kiyinish xonasida og'ir muhit hukm surgan. Futbolchilar bir-biri bilan deyarli gaplashmagan, ayrimlarida hatto dush qabul qilishga ham xohish qolmagan. Jamoa a'zolari uzoq vaqt sukut saqlagan holda kiyinish xonasida qolib ketgani aytilmoqda.

Shuningdek, futbolchilar klub avtobusiga ham belgilangan vaqtdan ancha kech qaytgan. O'sha paytda ham ular shok holatida bo'lib, jimjitlik saqlaganlari ta'kidlanadi.

Mazkur bahsda “Manchester Siti”ning o'zbekistonlik himoyachisi Abduqodir Husanov asosiy tarkibda maydonga tushib, to'liq 90 daqiqa harakat qildi.

Eslatib o'tamiz, “Real Madrid” UEFA Chempionlar Ligasi 1/8 final bosqichining dastlabki uchrashuvida “Manchester Siti”ni 3:0 hisobida mag'lub etdi. Jamoalar o'rtasidagi javob uchrashuvi 17 mart kuni Manchesterdagi “Etihad” stadionida bo'lib o'tadi. Uchrashuv Toshkent vaqti bilan 18 martga o'tar kechasi soat 01:00 da boshlanadi.

Manba: daryo.uz