Unai Emeri «Aston Villa» bilan 100-g'alabaga erishdi va klub rekordini o'rnatdi

«Aston Villa» bosh murabbiyi Unai Emeri ingliz jamoasi boshqaruvidagi 100-g'alabasini qo'lga kiritdi. Bu natija Evropa ligasi 1/8 final bosqichi birinchi uchrashuvida qayd etildi. Unda «Aston Villa» mehmonda «Lill»ni 1:0 hisobida mag'lub etdi.

Emeri klub tarixida 100 ta g'alabaga eng tez erishgan murabbiyga aylandi. Ispaniyalik mutaxassis bu natijaga erishish uchun 181 ta o'yin o'tkazdi.

Unai Emeri «Aston Villa»ni 2022 yil 24 oktyabrda qabul qilib olgan. O'shanda jamoa Angliya chempionatida jon saqlab qolish uchun kurashayotgan edi. Hozirgi kunda esa birmingemliklar 29 ta o'yindan keyin 51 ochko to'plab, Angliya Premer-ligasi jadvalida 4-o'rinni egallab turibdi va Evropa ligasi 1/8 finalida ishtirok etmoqda.

Evropa ligasi. 1/8 final, dastlabki o'yin
12 mart 2026 yil, payshanba.
«Lill» (Frantsiya) — «Aston Villa» (Angliya) — 0:1
Gol: Uotkins, 61.