“Manchester Yunayted” tez orada bosh murabbiy nomini e'lon qiladi

Angliyaning “Manchester Yunayted” rahbariyati tez orada yangi bosh murabbiy borasida yakuniy qarorni e'lon qiladi. Bu haqda The Touchline nashri xabar berdi.

Hozirda klub rahbariyati Maykl Kerrikni asosiy nomzod sifatida ko'rmoqda. Bunga jamoaning so'nggi vaqtlardagi ijobiy sport formasi va “qizil iblislar”ning evrokuboklar yo'llanmasi uchun kurashni davom ettirayotgani sabab qilib ko'rsatilmoqda.

Biroq, klub ichida yuqori saviyali, elita darajasidagi taktik mahoratga ega va kuchli etakchilik qobiliyatiga ega murabbiyni tayinlash tarafdorlari ham talaygina. “Mankunianliklar” rasmiylari bir qator potentsial nomzodlarning holatini o'rganish bo'yicha so'rov yuborgan. Nomzodlar ro'yxatidan quyidagi mutaxassislar joy olgan:

Yulian Nagelsmann (Germaniya terma jamoasi);
Andoni Iraola (“Bornmut”);
Migel Sanches (“Jirona”);
Matias Yaisle (“Al-Ahli”, Saudiya Arabistoni).

Shuningdek, agar imkoniyat paydo bo'lsa, klubdagi ba'zi nufuzli shaxslar uchun “PSJ” bosh murabbiyi Luis Enrike hamon “orzudagi variant” bo'lib qolmoqda.

“Vaziyat rivojlanishda davom etmoqda. “Yunayted” yaqin haftalar ichida barcha variantlarni tahlil qilib, yakuniy qarorni qabul qilishi kutilmoqda”, deyiladi xabarda.

Avvalroq “Manchester Yunayted” Germaniya terma jamoasi ustozi Yulian Nagelsmann bilan muzokaralarni boshlagani haqida xabarlar tarqalgan edi.

Ma'lumot uchun: 38 yoshli Nagelsmann 2023 yildan beri Germaniya terma jamoasini boshqarib kelmoqda. U bunga qadar “Hoffenhaym”, “Leyptsig” hamda “Bavariya” klublarida faoliyat yuritgan. Uning Germaniya futbol ittifoqi bilan amaldagi shartnomasi 2028 yilga qadar mo'ljallangan.

Manba: daryo.uz